Wat ha ki jingïalang sorkar, la mana pyndonkam bilor um plastik

Ka Sorkar Jylla lyngba ki jingbthah jong ka Meghalaya High Court ka la mana ban pyndonkam ia ki plastik ba pyndonkam tang shisien  (ki bilor um), la ong ka Deputy Commissioner (DC) ka East Khasi Hills ka Kong RM Kurbah. Haba kren ha kawei ka jingïalang, ka Deputy Commissioner u la kyntu ïa ki nongpynïaid ia ki jait prokram ba kim dei ban sam ïa ki bilor um sha ki nongwan sha ki jingialang bad ha jaka ki bilor um plastik dei ban pynshlur ïa ki briew ban pyndonkam ïa ki Jok um, ki kittli lane ki bilor um ki bym dei plastik.

“Ban ai nuksa, wat ha ki prokram Sorkar ruh, ngim shah ban pyndonkam ia ki bilor plastic (kiba die ha ka dor T.10-T.20) ngi sam um sha ki riew pawkhmat da ka um ha ki jug bad wat na ka bynta ki paidbah, ngi ai da ki kittli um ba 10-20 litar” la ong ka Deputy Commissioner. Ka Deputy Commissioner ka la kyntu ruh ïa ki kmie ki kpa ba kim dei ban pynshlur ïa ki khun ban rah ïa ka um sha ki skul da ki bilor plastic ba pyndonkam tang shisien namar kum kine ki plastik ym tang ba kin wanrah jingma ïa ka mariang hynrei wat ïa ka koit ka khiah ki khun jong ki.

“Kine ki bilor ba la song ki dei ki plastik ba pyndonkam tang shisien bad shisien ba la pyndonkam ki donkam ban bret noh. Nga kyrpad ia baroh ba kim dei ban bret pathar ia kum kine ki bilor hynrei ban bret ha ka jaka ba la buh kyrpang namar ia kine ki bilor lah ban pyndonkam biang na ka bynta ban shna surok” ka la ong.