Wat la kiwei ki kynnoh hynrei ngin trei ia ka kam: Wailadmiki Shylla

U MLA ka Jowai constituency uba dei ruh u State Youth President NPP u Wailadmiki Shylla hynnin ka sngi ha ka jingleit synran jong u ia ki kyrtong ba wan thep kyrteng na ka bynta ban iakhun ia ka election MDC na ki constituency bapher bapher ha ophis u Deputy Commissioner ha Jowai u ong, na ki 29 tylli ki Constituency ha JHADC, ka party kan pyniakhun kyrtong ha ki 28 tylli lait noh ka Rymbai Constituency.

U ong ha baroh 28 tylli ki Constituency ka jingiakhun kan long beit hapdeng ka NPP pyrshah ia ka UDP ne ka VPP. Bad halor ka jingdon ki party thymmai u Wailadmiki u ong ba ki shaniah ha ki kam ba ka party NPP ka la leh namar naduh  ba sdang ia ka sorkar, kam juh pynlut por ban jubab ia ki nongkynnoh kynthoh, hynrei  naduh u myntri rangbah, ki symbud myntri rangbah kum u Sñiawbhalang Dhar uba peit ia ka  Ri-lun Jaiñtia la iohi ba ki kam jong ki ki kren. U ong ki kam ba bha ba la leh ka NPP ki kren,  lada phai ha Jowai kum ka Iawmusiang Complex kaba la iakren ha man ki Election, kumba long mynta ka jingpyntrei ka la iaid shakhmat bad khmih lynti ban lah pyndep ia ka hapoh shi snem tam.

Shuh shuh ula kdew  ha kine ki sngi ba la  dep ka Coal Ministry ka la pdiang ia lai  tylli ki mining Plan bad kaba sah sa tang ban sdang tih dewiong noh. Bad da kane yn sdang kiew biang ka bhah pisa ka Council. Ula bynrap ruh da kaba ong, “kiba beiñ ai kin mat beiñ hynrei mangi ngin trei ia ka kam”.Ha ka jingiadei ban pynkup bor shuh shuh ia ki District Council hapoh ka jylla, u Wailadmiki u ong ba ka sorkar hi ruh ka la don jingthmu ban pynkup bor shuh shuh ia ka District Council.

Ula pynkynmaw ha ka por ba ka Executive Committee ka JHADC ka shimti ha u 2019 ka pla Tangka ka Council ka duna bha, hadien nangto wan  sa ka  khlam COVID ar snem bad  ha ki ar snem ka  Council kam ioh bhah shuh kumba  juh ioh bad watla katta ruh ka sorkar jylla ka iai kyrshan ia ka Council.