Wat la maham u DC, yn iaid shakhmat ka MCTODA ia ka jingiakhih

Ka seng ki trai trok bad nongñiah trok ba hap hapoh ka lama jong ka  Meghalaya Commercial Truck Owners and Drivers Association MCTO&DO) ha ka 14 tarik mynta u bnai  ka la dep pynbna paidbah ban sdang ia ka jingiakhih ba khlem buh por naduh ka 27 tarik mynta u bnai da ka ban bat ia baroh ki  trok kit cement bad clinker ba wan na ka thaiñ East Jaiñtia, namar ba ki company pynmih dewbilat haduh mynta kim pat treh ban bai siew bai kit ia ki ha ka dor ban ia imlang katkum ka dor sorkar wat lada bun sien kila dep ai jingthoh sha ki bad iakren pynbeit hakhmat u DC ka East Jaiñtia Hills District.

Ia kane ka jingiakhih ka seng ka la pynkhreh ban pynlong naduh surok  Bye pass Soomer Mihmyntdu shaduh Khliehtyrshi namar ba ha kine ki jaka ka la ioh jingbit na ki bor shnong. Hynrei katba ka seng ka dang ap ban poi katei ka sngi sdang jingiakhih pynban ha ka 24/10/2025  ka la ioh pdiang ia ka shithi na u DC ka WJHD uba la ong ba kin ym shah satia ban pynlong ia ka jingiakhih. Ha kajuh ka por ruh na ka liang ki bor pulit ka WJH ki la maham ia kiba lada kin pynlong jingiakhih yn sa kem ia ki. Kumta na ka liang ki dkhot ka MCTODA Jaiñtia Unit  ha ka  25/10/2025 ki la lum jingialang mar mar ha phyllaw ka community hall Khliehtyrshi ban iamir ia phylliew jingmut ha ryngkat ka jingdonlang ki nongialam ka central body ba kynthup u President ryngbah u Moslandar Marngar.

Ha kane ka jingialang naduh u President central body bah Moslandar Marngar, lem ki nongialam ka Jaiñtia Unit ba kynthup u Heibormi Pariat, u Kmen Myrchiang ki iathuh ba na ka liang ki para dkhot baroh ki la iarai lang kawei ka sur ban iaid beit shakhmat ia ka jingiakhih wat lada wan ki jingpyntieng pynsmeij, da kaba ong ruh ba ki long la kloi ban shong iingbyndi na ka bynta ka jingiakhun ia ka hok. Kumta ki khot ki wer ia baroh ki trai trok, ki nongñiah trok bad ki paidbah ban wan ai jingkyrshan lang ia ki ha kane ka jingiakhih jong ki ka ban sdang mynta ka sngi ka 27 tarik.