Wat la pyrshah Rel ha Khasi-Jaintia, ka Ri lum Garo kan pdiang

U Nongialam ka National People’s Party (NPP) u badei ruh u Myntri Sorkar u Marcuise N Marak ula ong ba lada ka Ri-lum Khasi Jaintia kim kwah ban wanrah ia ka lynti rel, ka Ri-lum Garo khlem pep kan dawa ban pynpoi lynti rel hapoh ka thain. Haba kren shaki lad pathai khubor u Marcuise ula pynthikna ba ki don katto katne ngut ki MLA na Rilum Garo kiba la phah jingthoh sha u Myntri Rangbah ka Jylla ban pyniair iaka lynti rel na Mendipathar North Garo Hills sha kiwei pat ki bynta ka thain Garo Hills.

“Lada ka Ri Khasi bad Jaintia kim treh ia ka lynti rel, khlem pep, ngi te ngin dawa ban pyniaid ha ri-lum Garo namar ngi donkam ban pynpyiar shuh shuh ia ka lynti rel na Mendipathar” la ung u Marcuise.U Marcuise ula ban jur ba ka jingpynpoi ia ka lynti rel na Mendipathar sha kiwei pat ki jaka kan ai jingmyntoi shi katdei eh ia ka thain, khamtam da ka jingpyndep ia ka jingkieng halor ka Wah Brahmaputra ka ban pyniasoh na Phulbari sha Dhubri.“Nga kwah eh ban pan ia ka jingpynti haduh East Garo Hills hynrei kaba biang eh kan dei ban pyniasoh ia ka sha South West Garo Hills namar ki don shibun ki kam rep ha ka thain bad lada pyniasoh bad hadien ba dep ka jingkieng halor ka Wah Brahmaputra ba pyniasoh na Phulbari sha Dhubri, kan sa dei ka jaka khaii pateng kaba heh ha West Garo Hills” ong u Marak.

Ka jingtyrwa ban pynpoi lynti rel ym tang ba kan pynkhlain ia ki lad pyniasoh hynrei kan kyntiew ruh ia ki kam khaii pateng ha West Garo Hills.Haba kylli la un phah ia ka jingtyrwa sha ka Sorkar, u Marak ula pynpaw ia ka jingsngewhun namar ba ka lynti rel ban pyniasoh haduh Baghmara kan iaid lyngba ka Williamnagar, ka ban ai jingmyntoi bha ia ka thain.“Kane kala biang palat ia nga namar lada pynpoi ia ka lynti rel haduh Baghmara, khlem pep kan iaid lyngba ka Williamnagar” ula bynrap.