Wat shah ialam bakla ha ki jingkynthoh kiwei party pyrshah ia ka NPP: Conrad

Ka Jirang Konstituensi ha ki 5, 6 snem ka la sakhi ia ka jingwan ki kam pynroi bapher bapher kaba la kot da ki spah klur bad kata ka dei hadien ba u paidbah kane ka Konstituensi ki la jied ia u Bah Sosthenes Sohtun kum u MLA na ka party NPP, ia kine ki kyntien la kren da u Conrad K Sangma, Myntri Rangbah ka jylla bad u National President ka NPP haba kren ha ka jingialang ialap election na bynta u kyrtong MDC ka Jirang Konstituensi. Ha ki jingialang ialap election ba la long mynta ka sngi ha Maikhuli bad Umpher, ki nongialam ka party NPP, ba la lamkhmat da u Conrad K Sangma lem bad u Bah Sosthenes Sohtun, MLA ka Jirang Konstituensi bad uba dei ruh u kyrtong ha kane ka ileksion MDC, u Bah Clement Mawlong, President ka NPP Ri Bhoi District nalor kiwei ki heh nongialam ka party NPP. U Conrad K Sangma, haba kren ialap election u la kren paidbah, ba kim dei ban shah ialam bakla ha kita ki jingkren kynthoh da ki party bapher bapher pyrshah ia ka NPP, hynrei ban puson hi da lade ba ka Jirang Konstituensi kaba dei kawei na ki Konstituensi ba sahdien tam la bun bun snem, hynrei ha kine ki 5 ne 6 snem ba ka NPP ka synshar kane ka Konstituensi ka la kiew ha kiba bun ki liang.

“U Bahdeng Sohtun u long u briew uba lyngkot ka rynieng hynrei u dei u briew uba sngewrit bad uba khlaiñ ka bor pyrkhat pyrdaiñ bad uba don ka bor ban tan ia ki kam pynroi ha ka Konstituensi Jirang bad la sakhi ha ka jinglong MLA ka jong u”, ong u Conrad K Sangma. Da kaba kyrpad sha ki paidbah ba kin ai ka jingkyrshan radbah ia u Bah Sosthenes Sohtun ban pynjop ha kane ka ileksion MDC, ula bynrap ruh da kaba ong, ba nga don ka jingsngewskhem ba ha kane ka kynti ka NPP kan long ka party marwei ban ioh ialam hapoh ka KHADC, JHADC bad wat ha ka GHADC, kumta ula khot wer ia ki paidbah ban pynjop ia u Bahdeng Sohtun ban nanglah ban pyniajan shuh shuh ym tang ha Secretariat hynrei wat sha ka District Council na bynta ki kam pynroi kiba dang bun. Na ka liang u Bah Sosthenes Sohtun, u la pynpaw ia ka jingkmen kaba khraw ba u Myntri Rangbah ka jylla uba dei ruh u National President ka party NPP, ula wan ban jngoh dalade ia ki paidbah ka Konstituensi ban ai mynsiem ia ki paidbah, ula bynrap ruh, da kaba ai khublei ia ka sorkar MDA ba lamkhmat da ka party NPP kaba la kloi ban theh bun spah klur tyngka ki kam pynroi hapoh Jirang Konstituensi.

U la ong ruh, ba watla ki kam babha ka party NPP ka la dep ban jubab ia ki paidbah kaba dei ka nongrim treikam jong ka party katba ki jingkynthoh kiba har rukom ki la nangmih man ka sngi, hynrei kum ka party hapdeng ki jingeh ba bun kan nym kynran dien bad ban iai trei shitom na bynta ka jingmyntoi u paidbah ha ka jylla hi baroh kawei khamtam ha Jirang Konstituensi. Shuh shuh ruh, u la ong, ba kum u MLA uba la treishitom ban pynurlong ia ki jingangnud jong ki paidbah ka Jirang Konstituensi bad mynta u don ka jingangnud ban nang bteng ia ki kam shakri wat lyngba ka District Council ban pynurlong sa ia ki nongrim kiba bun.