Ym dei ba ki rep u long hi, ong u Rangbah shnong

Palat spah ki pulit ryngkat ki heh sorkar hynne ka sngi ki la hiar sha ka shnong Laitulong ba hap ha Hima Sohiong, East Khasi Hills ban pynjulor bad jynrat naphang ia u Ganja ba la rep ha katei ka shnong. Ka kynhun pulit ba la leit khynra ka kynthup ia ki ANTF, SOT, ki pulit na Shillong bad Sohiong ryngkat ki heh ka tnad Excise, Forest bad u Block Development Officer (BDO) jong ka Sohiong. Kane ka kynhun ka lap ba la rep ia u Kanja ha kylleng ki jaka bad ka la leit ban jynrat lut ia u kanja ba suba ba la rep ki paid nongshong shnong ban ioh die be-ain kum u jingdih pynbuaid ynda u la tyrkhong.

U Rangbah Shnong ka Laitulong u Bah Lawstar Kharkrang ula ong, ba ki paidbah kim shym la rep khnang ia une u kynja hynrei u mih hi bad bun sien ki paidbah ki ju pynkylla sboh lyngba une u kynja bad ula ong ba ym don jingtip ba kan dei kaba ki la rep khnang ban ioh khaii be-ain. Ula ong ba ki paidbah ki ot ia u kynja bad ki leit ban thep ha ki sem sniang bad sem blang khang ba kin ioh sboh, hynrei kumba ki ong ba u kynja u dei uba pyndonkam kum u jingdih ba sniew kumta ki paidbah ki dei ban pom noh ia une u kynja bad ym dei ban rep hi. U Bah Kharkrang ula iathuh na ka liang u BDO ula bthah ia baroh ki nongshong shnong ba kin iatreilang bad ki pulit ha ki 3 sngi ban pom bad jynrat lut ia baroh ki kynja ba la mih ha kylleng ki jaka ka shnong.

U Superintendent of Police ka East Khasi Hills u Bah Vivek Syiem ula pyntip ba ki la ioh ban pynjulor haduh 10 Ton u kynja ba la rep be-ain ha ka jaka ba heh 5 hektar. Hadien ba la dep ban lum ia une u kynja ba pom bad jynrat naphang kumta ki la pynduh pyndam noh da kaba thang ha ka ding ula ong ba ka jingrep ia u Kynja ka long be-ain bad ki lah ban shah pynngat ha ki kyndon ka NDPS Act.