Ym pat lap ïa la met u rangbahba hap ha wah ha Ri-Bhoi

Uwei u Rangbah briew uba la tip kyrteng EB Nongshli, 47 snem ka rta uba naka Shnong Umtasor Mawdkhar, katba u dang shongkai ha ka jingkieng Wah Ïewsier lem bad ki paralok u la poi hap pynban sha wah bad namar ka jingheh jong ka wah ka la kit ia u tei u Rangbah haduh bym lap shuh ia u wat la na ka liang ki paralok bad ki briew shnong ki la ia treishitom ban wad. Katei ka jingjia ka la jia haka janmiet jong ka 27 tarik Naitung ha ka por 7 baje eiei katba utei u Rangbah u dang ia shongkai lem bad ki paralok ha katei ka jingkieng bad ha ka por ba khlem poi pyrkhat utei u Rangbah u la hap pynban shapoh katei ka wah.Haba kren naka liang u Rangbah Shnong Umtasor Mawdkhat u Bah R Mukhim u la ia thuh ba kane ka jingjia ka la jia ha kapor 7 baje eiei bad mar ia ioh ia kane ka jingtip u la pyntip wut wut sha ki bor ka Pulit Nongpoh bad ban leit mih sha katei ka wah.

Shuh shuh u la iathuh, na ka liang ka Shnong ki la ïa pyrshang ban ngam sha katei ka wah bad ban wad baroh shimiet, hynrei ym shym la lap ïa utei u Rangbah bad ha kane ka sngi naduh ka por mynstep ki la hiar biang sha katei ka wah ban pyrshang wat biang ia utei u Rangbah.Ka Kong Phyrnai Nongshli para arkmie jong utei u Rangbah ka la iathuh ba utei u Rangbah u la mih dang step na iing daka jingthmu ban leit peit iaka lyngkha, phewse yn da la miet ki ioh iaka khubor kaba sngewsih ba utei u Rangbah u la hap ha katei ka wah.Ka la iathuh ba mar ia ioh ia katei ka khubor mar mar ki la mareh sha katei ka jaka ban wad ïa utei u Rangbah ha ryngkat ka Shnong. Katei ka kong ka la pynpaw iaka jingsngewnguh iaki briew Shnong kiba la pyrshang ban wad ia u briew jong ki wat la kim pat ia ioh ia ka met jong utei u Rangbah.

U bah Emlang Blah ba shong ba sah haka Shnong Saiden u paralok ba ia shong kai lang  bad u Rangbah u uba hap shapoh wah Ïew sier u la ïa thuh ba u poi ha katei ka jaka ban pom lung ban rah sha iing bad mar ïa dep u la thep ïaka lung hapoh ka Auto jong u bad mar kumta u lap ïa utei u Rangbah ba u dang wan na ka jaka rep bad namar ba ki ia ithuh ithaw ki la ia poi ia kren kai bad khana bad utei u rangbah ha katei ka jingkieng. U la iathuh ruh ba katba ki nang ia shong kai pyngngad ha katei ka jingkieng utei u Rangbah u la shu hap kynsan shapoh katei ka wah bad mar kumta naka liang ubah Emlang lem bad kiwei kiba ia shongkai lang ki la hiar pynsted shapoh wah ban wat ia utei u paralok uba la hap shapoh ka wah bad mar kumta hi ki la phone sha ki Bahaiing Ha sem ban pyntip ia kane ka jingjia.