Ka iingbishar Meghalaya High Court ka la btah ia ka sorkar jylla ban shimkhia ban pyndep kloi ia ka shim jaka na bynta ban pynheh ia ka kad liengsuin Umroi, namar ia kane ka kam la bthah na ka por sha ka por ia ki bor sorkar ban pynkloi na bynta ka jingbit jingbiang ki ki paidbah ka jylla ha ka leit ka wan.
Ka bench jong u Chief Justice u I.P. Mukerji bad u justice W. Diengdoh ki la bthah ia ki bor sorkar ban pynkloi noh ia kane ka kam, namar ka pisa T.72,17,56,237/- ba la mynjur da ka kynhun myntri ha ka 4 tarik u Iaiong, 2025 la pyllait da ka Jylla sha ka tnad District Rural Development Agency ban thied jaka ba 11.75 akar na ki riew shimetba dei ki trai jaka.
Wat katei ka mat ka long kaba donkam hynrei ha ka kaiphod u Additional Advocate General ka Jylla kam shym pynpaw ba ka sorkar ka shim khia ha ka jingai jingmut watla baroh ar ki sorkar pdeng bad sorkar jylla ki sngewthuh ia ka jingdonkam ban pynheh ia kane ka kad liengsuin ha Meghalaya.
U Deputy Solicitor General, Dr Mozika ula phah kaiphod sha ka Airports Authority India ka dei lad ban pynkut ia ka komtrak ban shna pynbha hadien na ioh ia ka jingbit na u Director General of Civil Aviation,
na ka bynta ka mariang bad hadien ba la ïoh ka jaka ban pynheh ka kad liengsuiñ.
La khmih lynti ba yn ioh ia ka jingbit na Environmental ha ka 31 tarik Risaw, 2025. Wat la ka jingbit na u Director General jong ka Civil Aviation ka dang sahteng.
“Ngi lah tang ban bthah ba ia ki sienjam ba la kdew haneng kiba la shim ka rukom sorkar kaba long ban pynsted. Ka la dei ka por ba ia kane ka project ba la pyrkhat la slem na ka bynta ka bha ka miat jong kane ka Jylla dei ban pyndep kloi katba lah.
Ka jingmudui yn bishar biang ha ka 8 tarik u Nohprah, 2025. Ia ki kaiphod ka sorkar Jylla bad ka sorkar pdeng dei ban pynpoi sha Kashari shwa ka tarik. Ia ka kopi jong ka kaiphod yn ai ha ka nongmudui ym duna ia ka 48 kynta shwa ka tarik ba la pynkynriah.