Ym tang ha Thangsko, don kiwei ruh ba jia, hynrei tap eit miaw kiba don ha ka bor

Ka nongtrei mon sngewbha ka Kong Agnes Kharshiing ka la kam ba ka jingjia ha ki jaka tih dewiong kam dei tang ha Thangsko, hynrei ki la don ruh ha kiwei kiwei ki jaka hynrei kiba don ha ka bor ki pyrshang ban tap eitmiaw.Haba kren halor ka jingjur ka jingtih dewiong beain ha ka jylla, ka kong Agnes ka la ong ba la ioh jingtip ba ha u Kyllalyngkot ruh la iap 2 ngut bad ka la thoh sha ka CBI sha Delhi ban tohkit hynrei na ka CBI, kila phah kopi sha u CS ka Meghalaya.Katkum ka jingong ka kong Agnes, ka jingma ka long ba bun kim tip ia ka rukom kaba la don lypa ka jingma ha ka rukom tih dewiong namar ba naduh mynshwa kila leh ia ka jingtih dewiong, kaba la pynjot ia ka mariang bad ka pynjot ia ki briew.Kane ka jingkren ka kong Agnes ka long hadien ba 27 ngut ki briew kila iap ha ka jingbthei ka krem tih dewiong beain ha Thangsko, East Jaintia Hills ha ka 5 tarik mynta u bnai.

“Kumno ka sorkar ka khaprip ia kane ka jingtih dewiong beain bad kane ka paw ka jingshisha ia ka jinglen jongki kaba la jia naduh mynshwa. Ha 2014 haba khang ia ka jingtih dewiong beain, sha Kashari kila ai jingtip ba la bun u dewiong ba la dep sei na krem bad u Nongbishar ula ong ba lada u dei ba la dep sei, dei ban siew ia ka khajna bad sa kit ban die”, la ong ka kong Agnes.Ka la kynnoh ba kane ka jingtih ka la bteng haduh mynta ka dei namar ba ki hap ban pyndap ia ka jingshalan ia ki briew shabar namar ba kila dep iasoi iakut bad kita ki malik kiba don shabar. Ka la kam ba bun ki jingjia kila shu jah bad kane ka jingjia ha Thangsko, ka la paw shai ba ka sorkar ka la thok bad ki pulit kim nud ban ktah ia ki. Lada dei ba kila tehlakam, kam don ka jingjia ha Thangsko, East Jaintia Hills.

Ka la kynnoh ba ka jingshalan dewiong beain ka la bteng hynrei kiba tip ki sngap noh namar ba kila shah pynbam pisa bad kila len bym don ka jingtih dewiong wat haba kila iohi ba ka don ka jingtih.“Ia kane ka jingjia ha Thangsko, dei ban kit ban ngat maki kiba don ha ka bor bad kim lah ban ong ba kim tip eiei kat kane ka jingjia bad ban shu pynbiej ia kine da ka pisa jong ki nongpyniap briew. Ka sorkar ka dei ban leh ia kaba dei bad kam lah ban shu kem kai ia uwei ar uba rit baria, kam don jingmut”, ka la ong.Ka la buh jingkylli ruh ruh, “Kumno ka trok kaba iaid naduh krem Dewiong shaduh Beltola kim iohi seh. Kawei ka trok kit dewiong hap siew kumba 90 hajar tyngka ban ioh iaid bad da ki spah tylli ki trok man ka sngi”. Lah ban kdew ba ka kong Agnes kaba la shah hiar thma ha ki paidbhur ha u snem 2018 hadien ba ka la mih ban pyrshah ia ki kam beain ha kaba iadei bad u dewiong ha kane ka jylla.