Yn ïakhun u Bah Ricky Shullai kum u kyrtong shimet

U MDC barim ka Laban-Mawprem Constituency u Bah Ricky Shullai, dang shen ula lum ia ka jingialang bad ki nongkitkam bad ki paid nongkyrshan ki jongu bad ula pynbna syndon ba un mih ban aireng ia ka elekshon MDC kum u Kyrtong khlem seng ne (Independent) na Laban-Mawprem. U Bah Ricky Shullai ula pynbna ia katei ha ka jingialang kaba ula lum ha ka miet jong ka sngi Thohdieng, ha khmat jong ki nongialam bad ki paid nongkyrshan kiba la wan na kylleng ki shnong kiba hap hapoh ka Constituency.

Ki katto katne ki nongialam kiba la kren ha ka jingialang, kila pynpaw ia ka jingkmen ia karai kaba la shim da u Bah Ricky ban iakhun ia ka elekshon kum u kyrtong khlem seng bad ki la pynpaw ba watla u Bah Ricky ula ioh ban long MDC tang ar snem hynrei ula pyni bad leh da ki kam na ka bynta ka bit ka biang jong ki paid nongshong shnong ka Laban-Mawprem Constituency. Kila kitbok ia u Bah Ricky bad ka pynpaw ba kin ai ka jingiatreilang bad ka jingkyrshan ba yn poi sha ka thong ka jingjop, namar watla ula rem noh ia ka elekhson MDC kaba la dep ym shim la jah noh hynrei ula bteng ban trei ia ki kam ba bha ki jongu bad ban don ryngkat beit bad ki paidbah khamtam bad kito kiba mad ia ki jingeh bad jingshitom.

Kumban shu pynkynmaw ha ka elekshon MDC 2019 u Bah Ricky Shullai ula iakhun na ka seng UDP bad ula shah pynrem noh da 19 vote ha u Bah Mitchel Wankhar uba la ieng na ka seng NPP.