U MDC ka Voice of the People’s Party (VPP) na Laitkroh Lyngkyrdem constituency u Bah Shemborlang Rynjah ula long ba la pynkhreh ban shimti noh ia ka shuki Chief Executive Member (CEM) ka Khasi Hills Autonomous District Council (KHADC). Kane ka dei namar ba ki MDC ba don ha ka Liang Pyrshah naduh ka United Democratic Party (UDP) bad National People’s Party (NPP) kim shym la thep kyrteng ban iakhun ilekshon na ka bynta ka shuki CEM. Ha shuwa kane ki 2 ngut ki MDC ka VPP ki la thep kyrteng ban iakhun ia ka shuki CEM bad Chairman jong ka KHADC. U MDC ka Lyngkyrdem-Laitkroh u Bah Shemborlang Rynjah un iakhun ia ka shuki CEM bad u MDC ka Mawkhar-Pynthorumkhrah u Bah Strong Pillar Kharjana un iakhun ia ka shuki Chairman.
Na ka liang u Secretary Legislative ka KHADC u Bah V Sohtun ula pyntip ba lait na ka VPP ym don kiwei ki Party kiba thep kyrteng ban iakhun ilekshon shuki CEM bad Chairman. “Hadien ba la bishar ia baroh ki kot ki sla, la shem baroh ki biang bad ym don na kiwei ki kynhun ba thep kyrteng ban ban iakhun pyrshah, kine ki ar ngut la thikna kin jop suk la shai ka sngi” ong u Bah V Sohtun. Ka VPP ka la rai ban thaw ka Executive Committee tang 10 ngut kynthup u CEM, Chairman, Deputy Chairman bad 7 ngut ki executive member ban pynduna ka jingpynlut ksan jong ka Council. Ka ilekshon ban jied ia u CEM kan long lashai ka sngi por 2 baje janmiet hadien ka ilekshon ban jied ia u Chairman ka ban long ha ka por 11 baje mynstep.
Ka VPP kan pynieng ia u MDC ka Mawhati, u Kynjohlang Rangtong kum u kyrtong ban iakhun ia ka ilekshon Deputy Chairman. Ki MDC ban shimti ia ka shuki Executive Member (EM) ki long u MDC na Mawthadraishan –bah Powell Sohkhlet, Nongthymmai -Winston Tony Lyngdoh, Mawkyrwat – Pynkhraw Kharjahrin, Mawkynrew MDC-Seiborlang Warbah, Umroi MDC-Isnei Hinge, Mylliem – Aibandaplin L. Nonglait bad Laitumkhrah-Malki ka kong Deiti Majaw.