Yn pynkhie im ka shnong Mawsadang ia ka jingiakop mareh Kulai

Hadien kumba Arphew Hynriew snem eiei ki paidbah ka shnong Mawsadang kin sa sakhi biang ia ka jingiakop pynmareh kulai ka ban sa pynlong ha ka madan Lynter kaba la ker sawdong da ka wah Umngi.Kane ka shnong Mawsadang kaba jngai 5 km na Tyrsad, kaba hap ha Hima Nongspung bad ka don kumba 129 tylli ki tnum iing, kan pynkhie im biang mynta u snem ia ka jingpyniakop mareh kulai kaban long ha ka 14 tarik Lber ha kaba u Lat ka jylla u CH. Vijayashankar ruh un sa wan ban sakhi ha katei ka sngi.Ha ka jingiakren bad u Sordar barim ka Mawsadang u bah Brilindar Jyrwa ryngkat ka jingdon lang u Secretary ka shnong bah Joinlang Shangpliang, ki la iathuh ba kane ka jingiakop pynmareh kulai la pyllong na bynta ban pynmih pisa ban iarap ban kyrshan ia ki nonghikai kiba hikai ha ka skul jong ka shnong.“ Ka jingthmu jong ngi ka long na bynta ka jingpynroi ia ka skul namar haduh mynta la siew tulop hi da ka shnong haduh ia lai ngut ki nonghikai skul,” la iathuh u bah Jyrwa.

Ula ong ba ka shnong ka shem jingeh bha ban pynmih pisa namarkata ka Executive Committee ka shnong ka la shong pyrkhat bad ka EC jong ka skul ha kaba ki la shim ia ka rai ban pynlong ia ka jingmareh kulai, khnang ban lah ban iarap pisa ia ka skul.Katkum ka jingiathuh u bah Jyrwa mynshwa ha kane ka madan la ju pyllong ia ka jingpynmareh kulai ha ka por ba katei ka thain kam pat ioh surok ha kaba ki briew ki ju pyndonkam da ki kulai ban leit ban wan, ban pynkit jingkit sha iew sha hat.Ka jingpynmareh kulai ka long kaba shongshit bha ha katei katei ka madan bad la pynpaw ka jingkhmih lynti ba mynta u snem ruh kan long kaba iphuh iphieng bad kaba jop.Nalor kane ka tamasa, ka shnong ka don ruh ki thwei kiba itynnad ha kaba lah ban shong bad niah lieng kaban khring ia ki nongwankai lada lah ban pynbha shuh bad lada ki trai jaka ki don ka jingkylluid mynsiem.

Ha katei ka 14 tarik Lber, nalor ka jingmareh kulai kan don ruh ka iew ki nongrep ban die ia ki mar jongki. Ka shnong ka pyllong ia kane ka tamasa ryngkat ka jingiatreilang bad ka Iatreilang Foundation. Na ka liang ka shnong ka khot ia ki paidbah ban wan sakhi ia kane ka tamasa pynmareh kulai ha katei ka sngi.  Ia ki nongjop ha ka jingpynmareh kulai, yn ai khusnam pisa ruh ha katei ka sngi.