Yn pyntreikam da ka ‘Pilot Project’ ban rat dyngkhong ia u drok

Ka Anti-Narcotics Task Force ka jyllaha ka jingialang hynne ka sngi hapoh ka jingialam jong u Myntri Rangbah ka jylla u Conrad K Sangma ka la iakren ia ki sienjam ban rat dyngkhong ia u drok ha jylla. Ka jingialang ka la iatai sani halor ki lai tylli ki sienjam jongki bor kiba dei khmih ia ka Ain, ka Tnad Pulit, ka jingtem ia ki jingma da ka Tnad ka Koit ka Khiah bad ka jingshngain ka imlang sahlang da ka Tnad Social Welfare bad la iakren ruh ia ki jingkylla kiba la ktah ha ka jinglong jingman, ki rukom treikam bad ki kam ki jam jong ka ANTF bad la iakren ruh halor ka jingtyrwa ia ka buit treikam bad ki jingiarap kiba donkam na ki tnad bapher kum ka tnad Ain, ka Koit ka Khiah, ka Pule Puthi bad ka Social Welfare.

U Myntri Rangbah ka Jylla Conrad K Sangma, ula ong ba donkam ban shim ïa ka rukom treikam kaba biang bad ka ANTF ka dei ban shong jingialang bad kawei pa kawei ka tnad bad ban pyntreikam ia ki buit treikam ha ki wat bapher bapher bad ban don ia ki buit treikam ki bapher bapher. “Ka jingtreikam jong ka ANTF ka long kaba khia bad kaba iar kumta kan long kaba iahap bha bad kaba don jingmut ban kheit shuwa ia ki soh kiba mih bad noh shapoh bad pyntreikam ia ki buit kum ka Pilot Project ne ka projek kaba shu pyrshang, ha ki katto katne ki jaka ba jyllei u droks hapoh ka jylla” ula ong.

U la ong, ba ki bor ka Aiñ kim dei ban aili iano iano ruh kiba don bynta ha ki kam shalan bad khaii ia u drok hynrei ka tnad ka Koit ka Khiah bad ka Tnad Socia Welfare ki hap ban shim ia ka kam ban ai jingiarap ia ki nongdih drok, ka koit ka khiah bad ban wanrah biang ia ki sha ka imlang sahlang bad ka tnad Pule Puthi kadei ban pynsngewthuh ia ki paidbah halor ka jingktah jong u droks. Ha ka jingialang la donlang u Symbud Myntri Rangbah ka jylla u Bah Prestone Tynsong, ka Myntri ka Koit ka Khiah ka Kong Ampareen Lyngdoh, u Myntri ka pule puthi u Rakkam Sangma, u Myntri ka tnad Social Welfare u Bah Paul Lyngdoh bad ka Director General of Police ka Kong Idashisha Nongrang ryngkat bad ki heh ophisar ka jylla.