Yn pyntreikam ‘QR Code’ ka tnar Excise ban iada ka jingleit ei ka khajna kiad

Ka tnar Excise ka la pyntip ban pyntreikam noh ia ka ‘QR Code’ ban buddien ia ka jingdie kyiad bapher bapher ha ka jylla. Ia kane ka rai la shim ha ka jingialang ba la pyniaid da u Myntri ka tnat Excise u Bah Kyrmen Shylla hynne ka sngi. Haba kren sha ki lad pathai khubor, ka Commissioner ka tnat Excise ka Kong Matsiewdor War Nongbri ka la iathuh ha ka jingialang ba pyniaid da u Myntri, la iakren sani bha halor ka jingpynkhreh ban sdang pyntreikam noh da u QR code ha ki mar hapoh ka Jylla.  Ka Kong Matsiewdor ka la pyntip ba ki District Officer haduh ki kyrdan Constable kin sa ioh ia ka jinghikai ba bniah bha halor ka rukom pyntreikam ia u QR Code.

Ka la iathuh ka jingpyndait QR Code ka long shibynta ban buddien ia ka kyiad IMFL naduh ka por ba dang shna haduh ka por ba thied ki dukan bad haduh da poi sha ki nongthied. “Lada long kaba lah ngin sdang pyntreikam noh da u QR code hapoh 60 sngi, kata ha u bnai Jylliew 2025″ la ong ka Kong Matsiewdor. Ka Kong Matsiewdor ka la iathuh ba ka kompani M/s CMP Enforce System LLP na Delhi kan pyntreikam ia ki QR code ha kaba man ki Ophis, man ki bottling plant, man ki distillery bad bonded warehouse bad kiwei haduh ki dukan retail (winestore) kin don ia kane ka bor ban buddien ia la ki mar.

Ka la ong ba kane kan iarap ia ka tnat ban buddien ia ka jinglait tuh ka khajna ba dei ban ioh lum ka sorkar.