Yn siew lut ka Sorkar ia ka bai sumar ki samla pule NEHU ba shah rat kali

Ka Sorkar Meghalaya kala rai ban shim hi ia ka jingkitkhlieh haba iadei bad ka bai lutksan ban phah sumar ia ki 2 ngut ki samla pule NEHU kiba la mynsaw jur namar ka jingshah rat ha ka kali ba niah da u dribar ba shoh khawiang.Ia kane ka pyntip da u Symbud Myntri Rangbah ka Jylla u Bah Sniawbhalang Dhar hadien ba wan jngoh ia ki 2 ngut kiba dang shah sumar ha Nazareth Hospital Shillong.Lah ban kdew ba 2 ngut ki samla pule jong ka tnat Chemistry hapoh ka skulbah NEHU kata ka samla Daritngen Pohdukhei bad ka samla Stephanie Shadap kila mynsaw jur hadien ba kila shah syllad ha ka kali Maruti ba niah da u Parmen M Sangma uba la shoh khawiang haka janmiet jong ka 17 tarik mynta u bnai ha phyllaw jong katei ka skulbah.

Haba kren sha ki lad pathai khubor u Bah Sniawbhalang ula iathuh ba ula bthah iaki Doctor bad ki bor pyniaid ka Nazareth Hospital ban leh ia kaba donkam ban pyntikna ba ki samla pule ki ioh iaki lad jingsumar ba paka.U Bah Sniawbhalang u la iathuh ba ula dep ban iakren ruh bad ki ba haiing hasem jong ki samla ha kaba u la pyntikna iaki ba ka Sorkar kan shim iaka jingkitkhlieh haba iadei bad ka jinglut jingsep ban sumar iaki khun jong ki.

“Kadei ka kamram jong ka Sorkar ban pyntikna ba ki samla pule ki ioh ka jingsumar ba paka bad ba tista khnang ba kin ioh noh iaka met kaba koit ba khiah” la ong u Bah Sniawbhalang.U Symbud Myntri Rangbah u la pyntikna ruh ba ka Sorkar Jylla ka kloi ban phah sumar ia baroh 2 ngut ki samla shabar ka Jylla lada ki dang donkam ka jingsumar ba khambha shuh shuh.Ula ban jur ba ka Nazareth Hospital ka don iaki lad jingsumar ba paka hynrei u la bynrap da kaba ong “Lada donkam ka Sorkar kan bah khlieh hi ban phah sumar iaki sha bar Jylla”.U Bah Sniawbhalang ula iathuh ruh ba iwei napdeng jong kine kiba mynsaw, i la kham biang hynrei iwei pat ki dang don hapdeng ka jingshah khmih bniah ha ki Doctor jong ka Hospital.