Yn siew pisa ka PWD ia ki nongrep ba shah ktah ha Pynthorneiñ

Hadien ba ki nongrep ka Pynthorneiñ ki la mad ia ka jingshah pynjulor ki pynthor rep kba na ka jingwan tyllep ki maw ki khyndew bad shyiap kiba tuid lyngba ka Liar Pamkam ha kine ki aiom slap ba la dep na ka jingpyntrei ia u surok Jowai Bypass ba pyniasoh na Treïongriang ha Khliehtyrshi,  kaba la wanrah ka jingduhnong bakhraw ia ki, mynta ka kynti pat ki la sdang ioh jingkyrmen namar ba ka tnat PWD ka la mih shakhmat ban siew da ka pisa haba ia dei bad ka jingduh ki nongrep, kumjuh ruh ba ka la kular ban pynkhuid ia ki khyndew ki shyiap ha baroh ki pynthor ba shah tyllep, ha ka bynta jong ka Liar Pamkam ruh ka jingpynkhuid ia ki maw ki shyiap ki khyndew ka la sdang. Kumta hynne ka 16/12/2024 kaba dei ka sngi sdang pynkhuid ka tnat PWD ia ka Liar Pamkam la wan sakhi lang ha kane ka jaka da ki ophisar ka tnat PWD ba kynthup u H. Nengnong Executive Engineer Jowai Central Division, u O. Thubru Asst Executive Engineer PWD NH Sub Division Jowai, u S. Chalam Junior Engineer NH Sub Division Jowai, u A. Lipon Sectional Assistant NH Sub Division Jowai kumjuh ruh ka jingdon ryngkat ki nongrep bad ki trai jaka.

U O. Thubru Asst Executive Engineer PWD NH Sub Division Jowai u ong, jingshisha ka jingpynkhuid ia ka Liar Pamkam ka la dei ban dep hynrei na ki daw bym ia sngewthuh jingmut u waheh shnong Khliehtyrshi bad ki nongrep ki trai jaka la pynsangeh shwa shipor, bad tad haduh ban da lah pynbeit la sdang biang ia ka jingpynkhuid ha kane ka sngi.U ong na ka liang ka Dhar Construction Company kaba pyntrei ia une u surok ryngkat ka jingiatreilang ka ophis katba kot i bor kila pyrshang ban ai jingiarap daka pisa kumjuh ruh ban  pynkhuid ia ki maw ki shyiap bad khyndew.Kumta u khmih lynti ba kane ka jingiasngewthuh jingmut kan iarap halor kumno yn pynbha pynmiat iaki pynthor rep bad kumjuh ruh iaka wah Myntdu. Bad lada wan jia biang ka jingshahktah ha ki aiom slap ban wan, u ong  kin dang bteng biang iaki lad jingiarap.

Ha kane ka sngi naka liang ki nongrep bad trai jaka ba kynthup u Kam Pakynteiñ, ka Middle Pakynteiñ ruh ki pynpaw ka jingsngewnguh ia ka tnat PWD ba ka la shimkhia ban pynioh ki lad jingiarap sha baroh 11 tylli ki longïing ba shah ktah.Kaba dang sahteng mynta ka long ban pynkhuid ia ka Liar Pamkam bad ia ki pynthor rep kba jong ki. Bad halor kane ki ong ba kim don jingartatien  namar ki la dep iasoi Agreement ruh hapdeng ki nongrep bad tnat PWD, ba kane ka jingpynkhuid kam dei tang shisien, hynrei lada jia  ba shah ktah biang ha ki aiom slap ka PWD kan shim ia ka jingkitkhlieh ban iaid bteng ia ka jingpynkhuid. Kumta ki khmih lynti ba nangne shakhmat kan ym don shuh kano kano ka jingpynwit bad kan iaid beit iaid ryntih noh khang ba kin ioh biang ia u khaw u kba bad ioh ruh ban rep man la u snem.