Yn ym aiwai ka Sorkar ïa ka MeECL sha kikompeni shimet

U Myntri ka tnat Bording u AT Mondal u la pynksan baka Sorkar kam don jingthmu ban aiti iaka tnat Meghalaya Electricity Corporation Limited (MeECL) shaki company shimet.  Kane ka wan hadien baka Khun Hynniewtrep National Awakening Movement (KHNAM) ka wan pan jingpynshai, daka ba kam ba kala ioh khubor, ba ka Sorkar ka don jingthmu ban aiti shaki Company shimet iaka MeECL.  Haba kren shaki lad pathai khubor, u AT Mondal u la ong “Hoid ka KHNAM kala wan ban iakynduh ia nga ban pan jingpynshai hynrei nga la kren shai shaki ba kam don kum kata”.

U AT Mondal u la pyntip ba ki don 4 tylli ki Sub-station baka Sorkar ka phah trei haki Company shimet hynrei kane ruh kadei thik tang ban lum iaka bai thang Bording (Bills). U la pynksan daka ba ong ba kine ki Sub-station ki treikam bha hynrei ki don ruh kiba ka Sorkar ka hap ban shong bishar hashuwa ban shim rai khatduh, la dang donkam ban aiti shaki Company shimet ne pynkut noh iaka jingphah trei. “Ka don kawei ka Company kaba pyntrei ia 3 tylli ki Sub-station bad kumba long mynta ngim hun iaka rukom treikam jong ka. Ngi la ai ruh daka Showcause Notice. Ngin sa shim rai haki sngi ban wan” u la ong.

Haba iadei bad ka Smart Meter, u Myntri ka tnat Bording u AT Mondal u la pyntip ba ka jingpyntreikam da ka Smart Meter kadei hi katkum ka jingbthah ka Sorkar Pdeng sha baroh ki Jylla ka Ri. U la pyntip ba baroh ki Jylla kila iaid shakhmat ban pyntreikam daka Smart Meter bad ka Meghalaya ruh kan ialeh katba lah ban bud iaka jingbthah ka Sorkar Pdeng.