40 KM dangsah teng ka jingker sainar shiah ha khappud India-Bangla: MR

U Myntri Rangbah ka jylla ula iathuh ba ki don sa kumba 40 km eiei ki jaka ha khappud jylla Meghalaya kiba khlem pat dep ban ker sainar shiah. Haba kren sha ki lad pathai khubor hynne ka sngi, u Conrad Sangma ula ong ba ka jingsahteng ban ker sainar shiah ha kitei ka jaka ka dei namar ka jingdon ki kynrum kynram. U Myntri Rangbah ula iathuh ba ki bynta kiba dang sahteng ban ker sainar kidei ha katto katne ki bynta ka East Khasi, West Jaintia Hills, East Jaintia, bad ha South Garo Hills. Hynrei la khmih lynti shen ba ynda la lah ban pyndep ia ki kynrum kynram, yn lah ban ker sainar pyndep noh.

Ula ong ban don ka jingshong shngain ha ki khappud ka ri bad ka jylla, donkam ban pyndep noh ia ka jingker sainar bad ka sorkar dang shen ka ladep shong ia ka jingialang bad ki tnad bapher bapher ka sorkar India ban pyntikna ban don ka jingshongsuk. “Nga khmih lynti ba shen yn lah ban pyndep noh bad ka sorkar ka la shimkhia bha ia kane ka kam ban pynsted ban pyndep noh ia ka jingker sainar ha khappud ka India bad ka ri Bangladesh ha ki bynta kane ka jylla Meghalaya,” ong u Myntri Rangbah bad bynrap ba haduh mynta ki dang iai peit pyrman ia ki jaka khappud ban don ka jingshong suk shong shngain.

Ula ong ba ka sorkar India ruh ka dang pyllong ka jingbuddien halor kane bad kyrmen ba shen yn pyndep noh.