6 haduh 11 tarik Lber yn pyni ia ka ‘Ha Lyngkha Bneng’ ha Soso Tham Auditorium

Naduh 6 haduh 11 tarik Lber yn pyni ia ka phlim Khasi ‘Ha Lyngkha Bneng, The Elysian Field” ha Soso Tham Auditorium, Shillong.Lah ban kdew baka Phlim Ha Lyngkha Bneng, The Elysian Field” baka shna da u Bah Pradip Kurbah kadei ka phlim Khasi kaba la ioh rah bun tylli ki khusnam shabar ka ri India. Ha ka jingiakren sha ki lad pathai khubor u tyngshop jong ka phlim u Bah Merlvin Jude Mukhim bad u Director u Bah Pradip Kurbah ki la khot bad wer ia ki paidbah nongshong shnong ka jylla Meghalaya ban sakhi hi da lade ia kane ka phlim ia kaba la pyni paidbah ruh sha kiwei pat ki ri jong ka pyrthei.

U Bah Merlvin u la wer ruh ia ki samla pule ban wan peit ia kane ka phlim ha kaba ka bairung ka long tang ha ka dor kaba 100 tyngka da kaba rah lang ruh ia ka Identity Card (ID). Kum ban shu pynkynmaw, ka phlim ‘Ha Lyngkha Bneng, The Elysian Field” ka la rah ia ka khusnam kum ka Best Film bad Best Director ha ka Moscow International Film Festival, NETPAC Award for Best Asian Film ha ka Moscow International Film Festival, Best Director ha ka Kolkata International Film Festival, Best International Film ha ka Pune International Film Festival, Best Editor ha ka SIFFA London bad ha ka Grand Prix for Best Film ha ka Lendoc International Film Festival.

Ki phlim Khasi kiba u Bah Pradip Kurbah kiba u la pynmih na ki snem ba ladep ki long ka “Iewduh, (Market) 2019” kaba la ioh khur san tylli ki khusnam, “Onatah (Daughter of the Earth) 2016 kaba la ioh rah hynriew tylli ki khusnam, “Ri – Homeland of Uncertainty (2014) kaba la ioh rah saw tylli ki khusnam, “Path – Short Film (2022)” kaba la ioh ia ka khusnam Best Short Film, 2nd Best Film bad Best Director.