Iphuh ka Shad Sajer Raid Nongpoh ha u Lum Kyntang Wyrtoh

Sa shisien pat ka Raid Nongpoh hapoh ka Elaka Nongpoh Sirdarship ki la pynlong ia ka Shad Sajer kaba iphuh iphieng ia ka la pynlong halor u Lum Kyntang u Lum Wyrtoh ha Nongpoh, Ri Bhoi District. Lah ban kdew, ba ka Shad Sajer ka dei kawei na ki jingshad Tynrai jong ka Raid Nongpoh ia kaba la pynkhie im biang kum ka dak ban pynneh pynsah ia ki matti kiba la buh naduh mynbarim khnang ba ka pateng ba mynta kan tip ia ka ka riti dustur, ki kolshor, ka riam ka beit tynrai nalor ki jingshad Tynrai jong ka Raid.

La wan ban shimbynta ha kane ka sngi, da u Bah Mayral Born Syiem, MLA ka Nongpoh Constituency kum u kongsan ha ka jingiadonlang ruh u Bah Luistar Lyngdoh, Acting Sirdar ka Elaka Nongpoh Sirdarship, u Lyngdoh Raid Nongpoh u Bah Linus Lyngdoh, nalor kiwei kiwei ki nongialam ka Raid, ki nongialam ka HNYF bad RBYF. La sakhi ha kane ka sngi, ia ka jingiashimbynta jong ki khun ki hajar ka Raid Nongpoh kiba la shimbynta ban pyniphuh iphieng ia kane ka Shad Sajer da kaba shimbynta ha ka riaw tynrai, ka shad tynrai kum na Shad Rah Kynthei, Shad Shuti Wait, Shad Mastieh bad kiwei kiwei.

Haba kren ha kane ka sngi, u Bah Mayral Born Syiem u la pynpaw ia ka jingkmen ba kum ka Raid Nongpoh ka dang iai burom ia ka riti dustur u mynbarim da kaba pynneh pynsah ia kane ka Shad Sajer kaba la bna nam naduh ki por ba mynshwa, u la ong ba wat hapdeng ka jingiaid jong ka juk stad mynta, kum ki pateng ba dang sah bad kiban sa wan ki dei ban tip ia la ka riti dustur, ki kolshor ba la buh da ki longshwa manshwa.

U la kyntu ruh, ia ki nongialam ka Raid ba kin nang bteng ban hikai bad ban pynneh pynsah ia kum kine ki jingshad Tynrai, watla kum ki nongialam ki lah ban dei kiba dang long niam tynrai ne kiba la long Khristan khnang ba ka pateng kan nang tip ia la ka tynrai ba ki wan, da kaba bynrap ruh, ba kum ki samla ka Raid Nongpoh ki dei ban sngew sarong ia la ka jong bad ban burom ia ka jong kiwei.