Ka tnad Information Technology & Communications ka Sorkar jylla hynne ka sngi ka la sam ia ka khusnam Meghalaya IT Awards 2026 sha ki 203 ngut ki khynnah pule kiba la wan shakhmat ha ka Klas X bad XII.
Ha kane ka sngi, ka sorkar ka la sam khusnam da ki Laptop sha ki 203 ngut ki khynnah kiba kynthup 131 ngut na ka MBOSE, 51 na ka CBSE bad 21 ngut na ka ICSE.
Ia kane ka jingai khusnam la pynlong hynne ka sngi ha u Soso Tham Auditorium, Shillong ha kaba la donlang u Myntri Rangbah ka jylla u Conrad K. Sangma, u Myntri ka tnad pule puthi u Bah Lahkmen Rymbui, ki heh sorkar, ki khynnah bad ki kmie ki kpa.
Haba kren ha kane ka sngi u Myntri Rangbah ka Jylla u Conrad K. Sangma, ula ai khublei ia ki khynnah pule kiba la trei shitom ha ka jingpule jong ki.
Ula ong ba kane ka jingialang ka long ka jingrakhe ban ai jingithuh ia ka jingtrei shitom, jingaiti bad ka jingskhem jingmut jong ki khynnah pule.
“Kane ka Laptop kadei ka jingai kaba rit, hynrei ka pyni pat bun ia ka jinglong jong kane ka tiar, kadei ka dak jong ka jingioh jingithuh, jingpynshlur bad ka jingngeit skhem ka jong ngi ha ka jinglah ka jong phi” ula ong ba kyntu ia ki khynnah ba kin pyndonkam hok ia ka tiar kaba ki ioh na bynta ka jingmyntoi jong ki.
U Myntri Rangbah ula batai shaphang ka jingiaid lynti jong u ha ka jingpule ha Wharton School of University, Pennsylvania.
Ula iathuh ba ula don ia ka jingangnud ban sdang ia kam lajong hynrei ula mad ia ki jingeh namar ka jingbym biang ka jinglong jingman ha katei ka por.
Ula ong ba kine ki jingshem ki jongu, kidei kiba la pynwandur ia ka sorkar mynta ha ka jingpyrshang ban tei ia ka jinglong jingman kaba khlain, kaba pynleit jingmut ha ka jingsengkam lajong, ka jingleh ia kiei kiei kiba long thymmai bad ban tei ia ka sap ka phong.
Ula ban jur halor ka jingmih shuh shuh ki lad ha kylleng ki bynta kiba kynthup ia ki teknoloji, ki kam pyniaid ia ki ophis ne kam, kam ialehkai, ka tem ka put bad ka jingpynmih ia ka bording kaba khuid.
U Conrad ula ai mynsiem ia ki khynnah pule ba kin pyrkhat ban noh synniang ia ka jylla.
“Phi dei ban don ia ka jingangnud bad ka jingjop ka wan haba phi leh ia kaei kaei kaba phi ngeit shisha nalade” la ong u Conrad.
Na ka liang u Myntri ka pule puthi u bah Lahkmen Rymbui, ula banjur ia ka jingkongsan ha ka jingwan shakhmat ha ka jingpule bad ka kam kaba la leh da ki Digital technology ha kaban kyntiew ia ka jingim kane ka juk kaba mynta.
“Ha kane ka juk ba mynta, ka jingioh jaka ka Digital kam dei shuh tang ka lad hynrei kala dei ka rukom im. Lada ngi sngewtynnad ne ngim sngewtynand ruh, ngi lah long pat baroh kiba don bynta lang ha ka”, ula ong.
Ula ong ba ka jingwanrah ka sorkar ia ka Community Integrated Skills Learning Programme, kan iarap ban sei ia ki sap kiba ki kynnah ki don.
Ha kajuh ka por, ula pynpaw ka jingsngewkhia halor ka jingduna kiban iakhun ia ka Civil Services.
“Naduh u snem 2013, ngi lah duna ha ka jingdon ki samla na ka jylla kiban shah ioh rung ban iakhun ia ka UPSC Civil Services Examination”, ong u ah Lahkmen.