Lap ksai ki pulit ïa kiba donkti pynïap ïa ka longkmie na wah Lapalang

U Supretendent of Police (SP) ka East Khasi Hills u bah Vivek Syiem ula ong ba ki pulit ki la ioh ksai ia kiba donkti ban pyniap ia ka longkmie ia kaba la lap ia ka metiap hynne ka sngi na wah Lapalang kaba don markhap bad ka shnong Rynjah bad Nongrah. U bah Vivek ula ong ba kane ka metiap ka lah ban dei jong ka kong Eilang Phawa 39 snem eiei, kaba la jah naduh ka 20 tarik Lber  na Lawjynriew, Shillong katba ka shnong jong ka, ka dei na thain West Jaintia Hills.  Haba kren sha ki lad pathai khubor, u bah Vivek ula ong ba ka rukom lap ia ka met jong kane ka longkmie, la suba ba kadei ka kam shah pyniap. Ula iathuh ba ia kane ka metiap la lap ha ka byrni plastik kaba la song bad teh ha borni.

 “Ngi la suba ruh ia u briew uba leh ia kane ka kam,” ong u bah Vivek bad bynrap ba kane ka metiap la suba ba ka la don la palat 10 sngi hynrei ia kane yn lah ban pyntikna hadien ba ladep ia ka Post Mortem. Ula ong ba na ka liang ki pulit mynta kin dang thwet ban kem ia kiba donkti. Ha ka jingiakren bad ki katto katne ki nongshong shnong, ka kong Bobina Dhar kaba dei ka President ka Seng Longkmie Lum Myrboh Nongrah, ka la iathuh ba hynne ka step Lah sngi u Blei, ki trai iing ki la ipher bha ia kawei ka byrni ha katei ka nala bad ynda ka la leit ka la iohi shisha ba ka byrni ka la boi skain bad mar mar ka la pyntip sha u Rangbah Shnong, Rangbah Dong bad ia ki pulit bad dei ynda la wan ki pulit, kila plie bad kila lap ba la boi ksain ba dei ka met iap briew. Katkum ka jingiathuh ka kong Bobina, ka la ong ba ki don ki briew kiba iathuh ia ka, ba ki iohi ia u Kennedy Khongsit uba shah kem dang shen halor ka jingdonkti ban pyniap ia u heprit Kyrshanbor Kharmudai 7 snem, u iaid lang bad ka kong Eilang  Phawa.

Ka kong Bobina ka la ong ba watla kam tip ia kata hynrei kaba lah ban pynshisha kan dei tang ka CCTV camera kiba don ha katei ka jaka ba ka die sha ha Nongrah. Katba katkum ka jingiathuh jong uwei u samla Rangbah, ula ong ba ha ka miet jong ka sngi baar ka taiew ba ladep, la ioh sngew ia ka jingsawa kaba khampher kumba lynthem maw ne sawa kumba bret bom eiei bad ka la pynsngew pher namar ban bret niut ruh ka jingsawa kaba khampher kynsha.  “Ha ka por kumba 11 baje eiei, ngi iohsngew kumba bret eiei shapoh kumba lynthem maw. Hynrei ngi khlem shuh namar la miet bad ngi la thiah noh namar ngi dang mut ba bret niut namar man ka por ju iabret niut,” ong u samla Rangbah.