Kem pang ki nongshong shnong ba jaboh ka um, dawa ka DS Dymmiew ia ka tnat PHE ban jurip

Ki don katto katne ki nongshong shong na ka shnong Dymmiew Mawprem Shillong ki la ïoh pang hadien ba ki la pyndonkam ïa ka umbam umdih kaba jaboh bad jakhlia, kaba ki la tan lyngba ka kawei ka top-um jong ka tnad Public Health Engineering (PHE).
Kane ka long katkum ka kaiphod na ka State Food Testing Laboratory ba peit bniah ïa kane ka umbam umdih, la pynthikna ba ka tei ka um kam long kaba shngaiñ bad ka don jingma lada ki longïing ki pyndonkam ïa katei ka um.
Ia kane la pyntip da u Rangbah Shnong ka Mawpren Dymmiew, u Bah Manphyrnai Marbaniang haka 11 tarik Iaiong 2026 hadien bala wan jurip iaka top um bad iaki pipe ba iaid naki nala harud surok.
Ha ka jingleit jurip la ïohi ruh ba ki pipe um ki ïaid lyngba ka nala ba jaboh bad i saitmet ban peit bad ka jingbym wan khmih bad peit na ka liang ka tnad PHE ki longïing jong ka shnong ki la hap ban pyndonkam da ka umbam umdih ba jaboh.
Haba kren sha ki lad pathai khubor u Bah Manphyrnai ula ïathuh ba ki don kumba 11 tylli ki longïing kiba tan um na ka tei ka top jong ka PHE.
U Bah Manphyrnai ula ïathuh ba ki longïing ki la pyndonkam ïa katei ka um ban dih ban bam naduh u bnai Kyllalyngkot 2026, bad haduh mynta ka tnad PHE kam shym la shimkhia ban peit ne pynïoh ïa ka umbam umdih kaba khuid ba suba.
“Nga la ai jingthoh sha ka tnad PHE, ba kan peit lem halor kane ka jingïoh um ba jakhlia jong ki longïing ha Mawprem Dymmiew, hynrei haduh mynta kim shym la wan peit ne khmih ïa ka um,” u la ong.
U Bah Manphyrnai ula kyrpad biang ïa ka tnad PHE ba kan shim khia mardor ban wan peit bad jurip ïa kane ka um, khnang ba ki longïing hapoh ka shnong kin ïoh ïa ka umbam umdih kaba khuid ba suba.
“Ngim tip ba kaei ka daw ba ki ophisar ka tnad PHE kim shym la wan bn jngoh ïa kane  ka um ban pynthikna ba ki nongshong shnong kin ïoh ka umbam umdih ba khuid” u la ong.
U Bah Manphyrnai u la bynrap da kaba ong, “Nyngkong ngi dang mut ba ka um kam lei hynrei hadien ba la dep phah peit bniah la lap ba ka um ka long kaba jaboh” ula ong.