Ki Polisi ka sorkar ha ka ‘Food Processing’ ban ym duhnong ki nongrep, ong u Chirag Paswan

U Myntri ka Sorkar Pdeng uba peit ia ka Ministry Food Processing Industries (MoFPI) u Chirag Paswan hynne ka sngi, ula lum jingialang jong ka Parliamentary Consultative Committee bad ia ka NIFTEM Council Meeting ha Courtyard by Marriott, Shillong.

Ha kane ka jingialang la iashim bynta ki ophisar jong ka Ministry kynthup ia u Avinash Joshi u Secretary ka MoFPI bad u Devesh Deval u Joint Secretary ka MoFPI, ryngkat bad ki dkhot ba dei ki MP bad kiwei ba don bynta lang ha ka kam.

Ka Parliamentary Consultative Committee ha ka jingialang ka la iakren sani na bynta ka ‘Food Processing’ kynthup ia ki sien jam ba la shim da ka Ministry ia ki polisi treikam ban wanrah ki jingkylla ha ka ri bad la ioh ruh ki jingbatai halor ki kam ba la pyntrei ba la wanrah jingkylla lyngba ka MoFPI bad hadien la ioh ki jingai jingmut na ki dkhot ka Committee ban kyntiew bad pynkhlain shuh shuh ban wanrah ki jingkylla.

Ha ka jingialang ka NIFTEM Council, la iatai sani ia ki polisi treikam ban ai jinghikai bad wad bniah bad pynkhlain ia ka Food Processing ha ka ri baroh kawei. Ki dkhot ki la iatai halor ki lad ki lynti ban pynwan dur bad ki jingdonkam ki karkhana bad ka jingiai mih ki lad bad ki kabu ha kane ka bynta.

Ka Ministry ka pynpaw ba kan pynleit jingmut ban kyntiew ia ka roi ka par lyngba ki jingkyrshan ia ki polisi treikam, ka jingpynkhlain ia ki tnad treikam bad ka jingiatreilang khnang ban poi sha ka thong ban pynlong ia ka ri India kum ka nongialam ha ka pyrthei ha ka Food Processing.

Haba kren ha ka jingialang u Myntri ka Sorkar Pdeng ula ban jur ka kam ba hakhmnat ka Food Processing ka long ban pynduna ka jingduhnong bad ban kyntiew ia ki mar rep bad ula pynpaw donkam ban shimkhia ia ki jingeh kynthup ka jingbym biang ia ki jingtei, ki lad jingiarap pisa bad ki kor ki bor teknoloji katkum juk mynta.

U Chirag Paswan ula ong donkam ka jingiatreilang hapdeng ki tnad sorkar bapher ban pynsuk ia ki kam khaii pateng bad ula iaroh ia ki sienjam ba la shim da ka sorkar ban pynbeit ryntih ia ka GST, kata ki jingpyrkhing na bynta ka jingshngain ki marbam mardih da ki tnad bapher bapher.