Khang khyrdep ar tylli ki skul Presbyterian bym don khynnah pule

Ar tylli ki skul SSA ha Mawthadraishan Constituency ki la khang khyrdep noh namar bym don ki khynnah ba wan pule, kine ki skul ki dei ka Kynshi Presbyterian Upper Primary School bad ka Mawroh Presbyterian Upper Primary School.

U Sub Divisional School Education Officer ka Mairang, u bah J. Thyrniang ula ïathuh ka ophis kam shym la khang ïa kine ki skul hynrei kine ki skul la katto katne snem ki don tang hapoh 10 ngut ki khynnah pule lane single digit bad mynta u snem ki long zero enrolment bad ka sorkar ruh ka la bthah noh ïa ki nonghikai sha kiwei pat ki skul ba kham bun ki khynnah pule hynrei ïa ka proposal ba la phah haduh mynta ym pat ïoh jingmynjur.

U bah Thyrniang ula ïathuh saw ngut ki nonghkai na kine ki ar tylli ki skul, ki la leit ban hikai noh sha kiwei pat ki skul kumba la bthah ka ophis katba ar ngut kiwei pat kim shym la leit bad ki ai daw ba kita ki skul ki la jngai na ka bynta jong ki. U bah Thyrniang ula ïathuh kine ki ar tylli ki skul ki bym don khynnah pule shuh mynta lada jia ba ki khynnah kin wan pule biang ha kine ki skul ha ki snem ban wan, ki nonghikai jong kine ki skul kin hap ban leit phai biang sha kine ki skul.

Shuh shuh la ïathuh ha Eastern West Khasi Hills District ki don palat san spah tylli ki skul Lower Primary bad Upper Primary kiba hap hapoh ka jingkmih ka ophis u SDSEO bad na kine ki don ki skul tang ar ngut ki nonghikai bad namar kata ka la donkam ïa ka sorkar ban thung nonghikai biang ha kine ki skul khamtam ha ki skul sorkar.