Kum shi bynta ban pynkhreh ïa ka jingïaid Proseshon bah jong ka Balang Katholik, u Myntri ka tnat Food, Civil Supplies and Consumer Affairs ka Sorkar Jylla, uba long ruh u MLA jong ka thaiñ, u bah Methodius Dkhar, ryngkat ki ophisar ka tnat Public Works Department (PWD), ki nongïalam ka Balang Katholik bad kiwei kiwei, ha ka sngi Palei ki la hiar ban jurip ïa katto katne tylli ki surok ha ka thaiñ Maweit.
Ka jingthmu jong kane ka jingleit jurip ka long ban pynthikna ba baroh ki surok kiba hap ha ka lynti ban ïaid ka Proseshon kin long kiba la dep pynbha bad siang rong bha, khnang ba ki riewngeit ka Balang Katholik kiba wan ïashim bynta ha kane ka Proseshon kin ïaid da ka jingsuk bad jingshngaiñ.
Ïa kitei ki kam pynbha surok la bei tyngka lyngba ka Sorkar Jylla Meghalaya, ha ka jinglut kaba la antad palat T. 3 klur, bad ka jingjrong jong ki surok ka long palat 2 kilomitar.
Ha ka por ba jurip ïa kitei ki surok, u Myntri Methodius Dkhar u la kyntu jur ïa ki kontraktor ba kin pyndep noh ïa ki kam pynbha surok hapoh ka 13 tarik u Nohprah 2026. U la pynpaw ba kane ka kam kam dei satia na ka bynta ka jingmyntoi jong kano kano ka seng saiñpyrthei, hynrei ka long ka jingdonkam kaba kyrkieh na ka bynta ka jingmyntoi bad jingsuk jong ki riewngeit ka Balang Katholik.
Ha kane ka jingleit jurip la ïadonlang ruh u bah Srally Rashir, MDC ka Mawshynrut, u Father Wilfred Kharpuri na ka Society of Jesus, uba long u Parish Priest jong ka St. Ignatius Loyola Church, Maweit Parish, ryngkat kiwei kiwei ki nongïalam bad ki riewrangbah jong ka Balang.
You may also like
-
Lada ïai ïuhroit ïa ki longkmie pyrshah Ropeway, ym banse ban mih surok: Ardent
-
Sa ha Jowai ïakhih ki nonghikai Deficit
-
Sdang ka tamasa ka thoh ka tar balai sngi ha Nan Polok
-
Ïakhih ki driver bos pyrshah ïa ka sorkar halor ka jaka ïeng kali ha Ïew Mawlong
-
Sdang ka jingrakhe ia ka Jubili Ksiar jong ka Wangala Festival
