Sdang ka jingrakhe ia ka Jubili Ksiar jong ka Wangala Festival

U Myntri Rangbah ka Jylla u Conrad K Sangma hynne ka sngi Balang, ula plié ia ka jingrakhe ia ka Jubili Ksiar jongka jingrakhe i aka 100 Drums Wangala Festival ha Wangala A’dam, Chibragre, Tura.

Haba kren ha ka jingialang u Conrad ual ong “Mynta ka sngi, nga dap da ka jingkmen kaba khraw ban pynurlong ia ka jingiohi jngai jong u P.A. Sangma (bam kwai ha dwar u Blei) ban rakhe ia ka Jubili Ksiar da ka jingtem ia 1000 tylli ki ksing”.

Ha kane ka sngi kila don 1,000 ngut ki nongtem ksing bad 3,000 ngut ki nongshad kiba la plié ia kane ka tamasa kaba 4 sngi hapoh ka mat “Ka jingsawa jong ki 1,000 tylli ki Ksing”.

U Conrad ula ong, ba u dap da ka jingkmen ban iashimbynta ha kane ka tamasa kaba heh tam jong ki A’chik bad khamtam ban sakhi ia ka jingpynlong ia kane ka tamasa ha ka sien kaba sanphew.

Nalor kane ula pynkynmaw ia ki nongsdang kiba la maitphang ia kane ka tamasa ha u snem 1976, kiba la khlad noh kiba kynthup ia u Captain A. Sangma, Sanford K. Marak, Dr. Bernard K. Marak, Probin Raksam, Hubert K. Sangma, Liander K. Mara, Herik S. Sangma, Felix R. Sangma bad u Garnet Mangsang.

Ula ong, ba dei ban kynmaw ia kine ki nongsdang ha kum kane ka sngi kaba kyrpang bad ban ai khublei ia ki watla kim don shuh bad ka sorkar ka kwah ban pynkup burom ia kine kiba la khlad noh ha kane ka jingrakhe kaban sah jingkynmaw bad ula ai khublei ruh ia A’king Nokma kane ka thain halor ka jingnoh synniang sngewbha ia ka jaka ban pynlong ia kane ka tamasa.

U Myntri Rangbah ula ong ba ka Meghalaya kala nang kiew bad nangroi, hynrei ka long kaba kongsan ban pynneh pynsah ia ka jinglong tynrai, kolshor bad ia la ka tynrai wat haba ki kam pynroi ki jia.

“Kane kadei ka jinglong tynrai ka jong ngi bad ngi dei ban pynneh pynsah ia ka, kyrshan ia ka bad ngi dei ban sngewsarong halor jongka” ula ong.

U Conrad ula pyntip ba ka Sorkar kala bhah T.20 Klur lyngba ka tnad PWD ban shna pynbha ia ka Wangala A’dam ryngkat bad ka ai sa T.6 na ka bynta ban pynlong ia kane ka tamasa mynta u snem bad ka ong, ba ka jingpyrshang ban ioh ia ka nam ha ka Guinness World Records kadei kaba donkam ban pynlut bun bha, hynrei ka Sorkar kala bhah da kaba pynshong nongrim ia ka jingkongsan bad ia ka jingdon jingmut.

Ha kane ka jingplie la wan ban iashimbynta da ka Mehtab Chandee A. Sangma ka MLA jongka Gambegre, u Arbinstone B. Marak u MLA ka Selsella, u Jimmy D. Sangma u MLA ka Tikrikilla, u Sanjay A. Sangma u MLA ka Mahendraganj, u CEM ka GHADC u Dormonath Sangma, ki MDC jongka GHADC, ki nongialam niam bad ki ophisar jong ka district.

Kumban shu kdew ia ka Wangala la pynlong nyngkong eh ha Asanang ha ka 6 bad 7 tarik u Nohprah, 1976, da kaba wanrah ia ki kynhun na ki shnong na kylleng ki bynta jong ka rilum Garo hapoh jong kawei ka rynsan ban pynneh pynsah ia ka jingleh tynrai ki Garo, ka tem ka put, ka shad bad kiwei kiwei ki jingleh kiba iadei bad ka kolshor kiba la iai bteng ban leh lyngba ka jingshimbynta lang jong ka imlang sahlang.

Ka jingsdang ia kane ka tamasa kala kynthup nyngkong tang 10 ngut ki kynhun ha kaba kawei ka kynhun ka don 10 ngut ki nongtem bad 30 ngut ki nongshad bad kine baroh kila tem ia ki 100 tylli ki ksing bad 300 ngut ki nongshad ban ai nam ia kane ka tamasa bad ha u snem 2020, la pynkynriah noh ia kane ka tamasa na Asanang sha Wangala A’dam kaba don ha Chibragre, hajan Tura.