Yn nang kiew ki nongmihkhmat ka HSPDP ha u 2028 : KP Pangiang

U Nongialam ka Hill State Peoples Democratic Alliance (HSPDP) u bah KP Pangiang ula pynpaw ka jingssngew skhem ba ka party kan nang skhem bad nang kiew ka jingdon ki nongmihkhmat ha u snem 2028.

Haba kren sha ki lad pathai khubor u bah Pangniang ula ong ba watla ka party ia mynta ka don tang ar ngut ki MLA, ka nongrim jong ka party ka skhem bad kaba sngewtynnad ka long ba nongialam bad ki nongmihkhmat jong ka Party ki kren bad ki ieng skhem ban ai ka jingshakri iaki mat treikam jong ka Party.

Haba kren halor ka jinglong jingman jong ki seng riewlum ha ka jylla, u bah Pangniang u la pynkynmaw ba ka APHLC kadei kawei ka seng riewlum kaba rim ha ka jylla kaba la sdang ia ka jingiakhun ban pynioh ia ka jylla hynrei kane ka party kam don shuh bad ka la mih bujli sa kiwei ki seng riewlum kum ka HPU, ka PDIC bad hadien mih sa ka PDF, PDM, KHNAM. Hynrei ka HSPDP haduh mynta ka dang don ia ki nongmihkhmat bad ka dang pynskhem ia ki mat treikam.

“Ki don ki jingshah tan ki MLA jong ngi khamtam ha ka samoi ba la dep, ngi don 2 ngut ki MLA bad ngi la ialeh khlem MLA ha u 2023 hynrei mynta ngi don 2 ngut ki MLA, te ka ai mynsiem ia ngi. Ngi kyrmen ba kane ka Party jong ngi na ka jingtlot bor mynta ngi la ioh bor ban leit sha ka election ban long ha u 2028,” ong u President ka HSPDP u bah Pangniang.

Ula ong ba ka jingneh jong ka seng, kadei namar ba ki mat treikam bad ki iai shakri hok. Watla kila mih bun ki jing shah kynthoh kum ka Party tang namar ba ki iatreilang bad ka MDA, ka party ka ieng beit hala ka nongrim bad ka jingleit iasoh bad ka sorkar ka long na bynta ban pynurlong iaki mat treikam jong ka Party.

“Kum ka Party ngi sngewthuh ba marwei ngim lah ban ieng ban thaw iaka ain ban pynurlong iaki mat,” ula ong.

Halor ka jingmih noh ki MLA ka UDP ban leit iasoh sha ka BJP bad NPP, u bah Pangniang ula ong ba ka long kaba sngewkhia ba ka party ka shah ieh bein. Hynrei ula ai mynsiem da kaba ong ba ka HSPDP ruh mynshwa ka la shah ieh bein bun snem hynrei kam shym kynran dien bad ka iaid shaphrang bad ka pynskhem iaki nongrim ka Party.