Ïa shim bynta da ki hajar ngut ha Proseshon Ïukharist Bah

U Lyngdoh Sohblei Rangbah ka Shillong, u Victor Lyngdoh, ha ka Sngi U Blei u la pynbna ba u 2027 un long u Snem kyrpang jong ki Samla ha ka Jylla Niam Bah Shillong. U Archbishop Victor Lyngdoh ula pynbna ïa kane ha ka jingrakhe ia ka Prosesshon Ïukharist Bakhuid ha Laitumkhrah, kaba la long ruh ka jingpynkut ïa u Snem ki Riewngeit 2026 ba la buh da ka Jylla Niam Bah.
Ha ka jingkren sha ki paid riewngeit, u Archbishop Lyngdoh ula ong ba ka Balang ka ieid ïa ki samla bad ka don ka jingkyrmen kaba khraw ha ki bad ula kyntu ïa ki ban mih shakhmat haba ka Balang ka donkam ïa ki, ban ïada ïa ka Balang bad ban long kiba shlur ha ka jingim jong ka jingngeit.
U Archbishop ula pynkynmaw ïa ki samla ba U Khrist u long uba jop bad ula kyntu ïa ki ban pynskhem ïa la ka jingngeit, ban long kiba duwai bad ban ïaleh ban jop ïa ki jingtynjuh jong ka pyrthei ban long kiba stad ha ka rukom pyndonkam ïa ki rynsan social media, ban sumar ïa ka jingim ba kynja mynsiem bad ban long kiba jai jai haba ki ïakynduh ïa ki jingeh.
Ka Shnat Niam Maria Nongïarap ki Khristan, Laitumkhrah, ka la pynlong ïa ka proseshon halor ka phang “Da ka bor jong ka Ïukharist, la khot ïa ngi ban long ka mluh bad ka jingshai jong ka pyrthei.” U Kardinal Filipe Neri Ferrão, u Lyngdoh Sohblei Rangbah ka Goa bad Daman uba long ruh u President jong ka Conference of Catholic Bishops of India, ula ïalam ïa ka proseshon da kaba rah ïa ka Sakrament Ïukharist Bakhuid Tam ha ka kali ba la pynriam bad pynkhreh kyrpang.
Ki paid riewngeit ki la ïaid lang ha ka prosesshon, da kaba duwai bad rwai katba ka jingïaid ka la ïaid lyngba ka thaiñ Laitumkhrah, Dhankheti bad Madan Ïewrynghep shaduh Kalbari. Ka Cathedral Band, ka Don Bosco Band bad ka Savio Junioriate Band kila tem ïa ki sur jingrwai ha ka lynti. Ka kynhun na ka Shnat Niam Laitkor ka la shim bynta ha ka riam tynrai bad ka la tem ïa ka ksing.
Ha Kalbari, la pynkut ïa ka proseshon da ka jingmane ïa ka Sakrament Bakhuid Tam, ryngkat ki jingduwai bad ki jingrwai. Ka Carmel Attard Choir na ka Shnat Niam Marbisu ka la ïalam ïa ki paid riewngeit ha ki jingrwai ha ka por jong ka jingmane.
Ha kane ka sngi u Myntri Rangbah ka Jylla u Conrad K Sangma, u Symbud Myntri Rangbah u Bah Prestone Tynsong nalor ki Myntri bad ki MLA, u Archbishop Victor Lyngdoh, Bishop Bernard Laloo bad bun bah ki Lyngdoh bad ki riewniam kila wan ban iashimbynta ha kane ka sngi kaba khraw.