Lyngba ka CM-Connect la lah ban pynbeit 5 hajar duna na palat 7 hajar ki jingud paidbah

U Myntri Rangbah ka Jylla u Conrad K Sangma ula ong, ba ka Sorkar Jylla kala lah ban pynbeit haduh 4,878 na ki 7,079 ki jingud jingnam kiba la pynsngew da ki paidbah ha kylleng ka Jylla lyngba ka prokram CM-Connect.
U Conrad ula kren ia katei dang shen ha ka jingleit iuhkjat ha ka shnong Amjong, kaba hap hapoh ka Mawhati Block, jong ka Ri-Bhoi District.
Ula iathuh ba ha Ri-Bhoi District, 552 tyli na ki 785 ki jingeh bala rejistar lyngba ka prokram, ki dei kiba la dep ban pynbeit, katba 233 ki dei kiba dang sah bad bishar.
Ka jingpyniasoh surok, ka pule puthi, ka scholarship bad ki jaka ai jingsumar ki dang dei ki jingsngewkhia kiba hakhmat eh bala pynsngew da ki paidbah ha ka District. Ka jingkhein ka Sorkar kala pynpaw ruh ia ka jingbym don ki Medical Officer kiba thikna ha Mawhati Primary Health Centre, kaba shakri haduh 42 tylli ki shnong bad kumba 26,429 ngut ki nongshongshnong.
U Conrad ula iathuh ba ka CM-Connect kadei kaba la pywandur ban ai ia ka rynsan ia ki paidbah ba kin pynsngew ia ki jingeh kaba ki iakynduh bad ban iarap ia ki bor synshar ba kin ithuh ia ki lad ban pynbeit bad kiba lah ban pyntrei kam noh ha ki shnong ki thaw bapher bapher.
Ula iathuh ruh, ba ka Sorkar ka dang bteng ban trei ia ki kam bad ki bor pyniaid ha ki District bad ki Block, ban pynbeit ne ban weng ia ki jingeh bad ki jingud jingnam kiba dang sahteng jongu paidbah bad ban pynkhlain ia ki jingai jingshakri.
Ula pyntip ba ka Sorkar kala pynlut kumba T.1,300 klur lyngba ka Meghalaya State Rural Liveligood Society (MSRLS) ha kine ki phra snem bala leit noh ban kyrshan ia ki kynhun treikam ki Kynthei ha ki shnong ki thaw bad ki kam ban kyntiew ia ka kamai kajih.
Ka Ri-Bhoi ka don haduh 5,207 tylli ki SHG kaba kynthup haduh 48,401 tylli ki Longiing. Ia kine ki kynhun la wanlang lang ha ki 544 tylli ki Village Organisation bad 32 tylli ki Cluster. Kumba 5,000 tylli ki SHG ha ka District kila ioh ia ki ram na Bank, kaba kot ia ka T.88.69 klur.
U Conrad ula aiti ruh ia ki kali AGEY ban kyrshan ia ka leit ka wan da ki kali bad ki kam kamai kajih. Ia ka kali la aiti sha ka Shilangkhrui Cluster Level Federation Women SHG Multipurpose Co-operative Society Ltd hapoh ka Umtrai Cluster.
U la sam ruh ia ki tiar sumar sha ki 6 ngut ki Kmie napoh ka Amjong Health & Welness Centre Catchment area. Kine ki tiar ki dei shibynta jong ka Mission 1000 sngi, kaba pynshlur ia ka jingleit kha khun ha ki jaka sumar, ka jingsumar ia ki khunlung, ka jingai buin bad ka jingheh jingsan ki khunlung.
U Myntri Rangbah ula plie paidbah ruh ia ka DA-I-HI textile Unit ha Sohnidan hapoh ka CM-ELEVATE scheme, kaba la pyniaid da u Bah Preciously Shadap bad aikam haduh 15 ngut ki briew.