Ioh khusnam ka KJP ‘Bharat Scouts and Guides’

Ka K.J.P. Girls Guide Company jong ka K.J.P. Girls’ Higher Secondary School, Jaiaw, Shillong, ka la ioh khusnam ‘Historical Unit/Group’ jong ka Bharat Scouts and Guides halor jingiai bteng ban noh synniang ha ka “Guiding Movement” naduh u snem 1950 haduh mynta.

Ka Meghalaya Bharat Scouts & Guides ka dap da ka jingkmen ban pynbna ba ka K.J.P. Girls Guide Company jong ka K.J.P. Girls’ Higher Secondary School, ka la ioh ia ka burom bad jingithuh kum ka Historical Unit/Group jong ka Bharat Scouts and Guides. Kane ka jingioh khusnam ka dei ia ki Unit ba la seng naduh u snem 1950 ne shwa kane bad ki dei ruh kiba la iai bteng ban treikam bad shakri haduh mynta mynne ha ka Scouts & Guides Movement” la ong ka State Secretary jong ka MBS&G ka Kong M. Lyngdoh ha ka kyrwoh khubor.

Ia kane ka khusnam la sam ha ka 4 tarik u Naiwieng ha National Headquarters, New Delhi ha ka jingrakhe ka seng ia ka Diamond Jubilee bad ka jingai khusnam ban ai jingithuh ia ki Unit ba la don ka jingiadei la slem bah bad ka seng, ka jingnoh synniang bad ka jingkular ba skhem halor ka ‘Scouting bad Guiding’

Lah bun phew snem ka K.J.P. Girls Guides Unit ka dei ba la ialam da ki nongialam ba pawnam kynthup kiba ioh khusnam Silver Elephant Award bad ia ka Padma Shri ka Kong Silverine Swer (bam kwai ha dwar u Blei), Kong S. Briliancy Lyngdoh (bam kwai ha dwar u Blei) bad ka Kong Evelyne Nora Shullai (bam kwai ha dwar u Blei) kaba long ruh ka State Secretary barim jong ka Meghalaya Bharat Scouts & Guides.

Ka jinglong nongialam jong ki ka la iarap ban sain dur ia kiba bun ban ioh khusnam ban sah kynmaw ia ka jylla halor ia ki kam radbah ka Girls Guides ha sngi ban wan.