Jurip u MLA ka jingtei ia ka skul EMRS ba T.60 klur ha Sohryngkham

U MLA ka Mawryngkneng Constituency u Bah Heavingstone Kharpran ula leit jurip ka jingtei ia ka Eklavya Model Residential School (EMRS) ha Sohryngkham, East Khasi Hills ha kaba u la pynpaw ka jingsngewkmen bad sngewhun halor ka jingiaid shaphrang ka kam.

Ha kane ka jingjurip, u MLA ula peit bniah ia ka jingiaid ka jingtei bad ula iakren bad u kontraktor lem bad ki engineer ba peit ia ka projek, khnang ban tip ia ka jingiaid shaphrang bad ia ka por ba la buh ban pyndep.

Katkum ka jingpynpaw jong u kontraktor ha katei ka jaka, la kular ban pyndep ia ka projek baroh kawei hapoh u bnai Lber 2027. U MLA u la pynpaw ia ka jingsngewkmen halor kane ka jingkular, bad ha kajuh ka por u la ban jur ia ka jingdonkam ban pynneh ia ka jingbha jong ka jingtei bad ban pyndep ia ka kam hapoh ka por ba la buh.

Ha ka jingai jingkren jong u, u Bah Heavingstone Kharpran ula pyntip sha ki paidbah jong ka constituency ba ia kane ka Eklavya Model Residential School ha Sohryngkham la mang bad mynjur ha ka jinglut ba T. 60 klur, kaba long kawei na ki projek ba kongsan ha ka pule puthi bad ka jingtei ia ki jingdonkam na ka bynta ka pule puthi hapoh ka thain.

Kane ka skul ka thmu ban ai ia ka jingpule ba bha ryngkat bad ka jaka sah na ka bynta ki khynnah pule, khamtam eh ia ki khynnah kiba dei na ki jaidbynriew riewlum, khnang ba kin ioh ia ki lad pule kiba kham bha.

U MLA ula pynkynmaw ka jingthmu ban wanrah ia kane ka skul ha Sohryngkham la sdang naduh u snem 2023. Naduh katei ka por, la don ka jingpyrshang bad ka jingbuddien kaba iai bteng bad ki tnad sorkar kiba dei peit, haduh ba kane ka projek ka la poi sha kane ka kyrdan jong ka jingtei ba mynta.

U Bah Kharpran ula pynpaw ruh ia ka jingsngewnguh ba khraw sha ka Dorbar Shnong Sohryngkham ba la ai ia ka jaka ba 15 akar na ka bynta ban tei ia kane ka skul.

U la ong ba ka jingiatreilang bad ka jingkyrshan jong ka Dorbar Shnong ka la long ka bynta kaba kongsan bha kaba la iarap ban pynurlong ia kane ka projek kaba donkam na ka bynta ka lawei jong ki khun samla bad ki pateng ban wan.

Ha kajuh ka por, u MLA u la pyntip ba u la dep ban kyrpad ia ka Sorkar Jylla ban shimkhia ban tei ia ka surok ban rung sha kane ka skul (approach road).

U la ban jur ba ka surok kaba biang ka long kaba donkam bha, ym tang na ka bynta ban pynsuk ia ka jingkit jingbah bad ka jingiaid jong ki kali ha ka por ba dang tei ia ka skul, hynrei ruh na ka bynta ka jingsuk bad jingshngain jong ki khynnah pule, ki nonghikai, ki nongtrei bad kiwei pat ynda la sdang ban pyniaid ia kane ka jaka pule.

U la pynpaw ia ka jingkyrmen ba ka Sorkar kan shimkhia ia kane ka jingkyrpad bad kan leh ia kaba donkam khnang ba ka surok kan long kaba la pynkhreh ha ka por ba kane ka skul kan sdang ban treikam.

U MLA u la pynpaw ruh ba un iai bteng ban buddien bad ban peitngor ia ka jingiaid jong ka projek, bad ban iatreilang bad ki tnad sorkar kiba dei peit, khnang ba ia ka kam yn lah ban pyndep hapoh ka por ba la kular da u kontraktor.

Ha kane ka jingjurip, u Secretary jong ka Dorbar Shnong Sohryngkham, ha ka kyrteng jong ka Dorbar Shnong, u la pynpaw ia ka jingsngewnguh kaba khraw sha u Bah Heavingstone Kharpran halor ka jingaiti por, ka jingtrei shitom bad ka jingpyrshang kaba khlem sangeh jong u naduh ba la sdang ia ka jingthmu ban wanrah ia kane ka skul ha u snem 2023.

U Secretary u la pynpaw ba ka jingshimkhia shimet jong u MLA, ka jingbuddien bad ka jingiatreilang bad ki tnad sorkar kiba dei peit, ka la iarap shibun ban pynurlong ia ka jingthmu ban wanrah ia kane ka jaka pule hapoh ka shnong Sohryngkham.

U la pynpaw ruh ia ka jingsngewkmen bad jingsngewhun jong ka Dorbar Shnong bad ki paidbah nongshong shnong halor ka jingiohi ia ka jingiaid shaphrang jong ka jingtei, kaba mynta ka la paw sh…