Lada long ban kynthih na kawei seng sha kawei, kam don jingeh ban kynriah ia ka Shillong Ropeway Project: TW Chyne

U Nongialam ka Liang Pyrshah ka Khasi Hills Autonomous District Council (KHADC) bad u General Secretary ka UDP u Bah Titosstar Well Chyne hynne ka sngi ula ong, ba lah ban pynkynriah ia ka Shillong Ropeway Project sha kawei pat ka jaka bad ula pynkynmaw halor ka jingtyrwa ban tei ia ka Ropeway ka ban pyniasoh ia ka Mawsynram bad ka Sohra.

Halor ka jingpyrshah jur bad ka jingdawa ban pynkynriah noh ia ka Shillong Ropeway sha kiwei pat ki jaka, u Bah TW Chyne ula ong, ba ka roi ka par kam lah ban wan lada ka ktah ia ka mariang bad ia ka jingim ki briew bad ula ong ba donkam ia ka roi ka par bad baroh ki kwah ia ka roi ka par, khamtam ki ban plie ia ki kabu bad ban kyntiew ia ka ioh ka kot jong ka jylla.

“Hynrei ngam kwah pat ba kano kano ka roi ka par kan ktah pat ia ka mariang ne kan ktah ia ka jingim jong ki paitbah” la ong u Bah Titosstar.

Haba kylli la ia katei ka projek dei ban rah noh sha constituency ka jong u, u Bah Titosstar ula ong, “Nga kwah ban pynkynmaw ia phi ba ha u snem 2015-2016, ha ka sorkar jong u Dr Mukul Sangma, ka la don ka jingtyrwa ban don ia ka Ropeway na Mawsynram ban pyniasoh shaduh Sohra bad kane ka la paw ruh ha ki kyndon jong ka jingmang tyngka, kaba nga lah ban ong. Hynrei kaba sngew lyngngoh, ka long hadien katei ka la shu jah klep noh. Kum u nongmihkhmat ka constituency, nga kwah ban pynkynmaw ia ka Sorkar sa shisien ba ka don ka jingtyrwa ban pyniasoh ia ka Mawsynram bad ka Sohra lyngba ka Ropeway”.

Halor ka jingkren u Myntri ka kam jngohkai ba yn ym lah ban pynkynriah ia katei ka project, u Bah Chyne ula kynthoh da kaba ong “Lada ka don ka lynti ban tei sa ia kawei pat ka projek ban pyniasoh ia ka Mawsynram bad Sohra, lada ka long kaba lah ban kynthih na kawei ka seng sha kawei pat, kumta ban pynkynriah ia ka projek ruh dei ban lah. La shah ban pynkynriah. Don ki khep ba ia ki projek ki bym ioh ia ka jaka la pynkynriah noh shawei pat. Ki don ki surok kiba la pyrshah, la pynkynriah noh shawei pat”.

Ha kaba iadei bad ka jingpyrshah ki paitbah ka thain Laban bad kiwei kiwei ki shnong, u Bah Tistosstar ula ong ba u ieh beit ha ka jingstad jong ki nongshong shnong ka Laban bad kiwei kiwei ki jaka, namar ba ka kynthup lang ia ki Rangbah Shnong, ki kmie. Na ka liang ka jong nga, ngam pat buddien bha ia kane ka projek, haduh katno kan ktah. Ngam pat lah ban ai ia ka jingkren kaba thikna na ka liang ka jong nga. Katba ngam pat shai bha, kaei ka jingiohnong bad kaei ka jingduhnong ha kaba iadei bad kane ka projek, ngan ym lah ban ong eiei”.