Ther ka JAC ia u Bah Paul, ka jingkren ba ym dei ban iam ne jaw umat ka dei ka jingthombor

Ka Joint Action Committee (JAC) Against the Shillong Ropeway Project ka la pynpaw ba kam don jingmut bad kam kwah ban leit kiew sha ka iingkashari ban phah tuklar halor ka jingiai mynthi ka Sorkar ban iaid shakhmat ban pyntrei ia ka Shillong Ropeway Project.

Ia kane la pyntip da ka dkhot jong ka JAC ka Kong Venetia Mawlong haba kylli, hato ka JAC kan leit ujor ne em sha Meghalaya High Court pyrshah ia ka Sorkar kaba pynksan ban iaid shakhmat ban pyntrei ia ka Project.

Ha shuwa kane ka Joint Action Committee (JAC) Against the Shillong Ropeway Project bad ka Green Tech Foundation (GTF) ki la pynlong ia ka jingiakhih da kaba shong kyllain mungor ban pyrshah ia ka jingpynksan ka Sorkar Jylla ban pyniaid shakhmat ban tei ia ka Ropeway ha Laban.

Ia kane ka jingiakhih shong kyllain mungor la pynlong ha khmat u Mot Kiang Nangbah uba don mar pyrshah ka Shillong Civil Hospital.

Haba kren sha ki lad pathai khubor ka Kong Venisha ka la ong, “Kam don jingmut haduh mynta, ngim pat don ka jingmut ne ngim pat don ka jingpyrkhat ban leit kiew sha ka iingkashari ba don burom namar phi sngewthuh ba lada ngi leh noh kumta ka jingiakhih jong ngi ka la kut noh, ha ka ba kut mano ban ia iakhun na ka bynta jong ngi, ka jingiakhun ka dei hapdeng ki plidar jong baroh arliang” la ong ka Kong Venetia.

“Te kam pat poi bad ngim pyrkhat kumta bad nga tharai ngim donkam hi ruh ban leit kiew shaka iingkashari ba don burom, ngin iakhun beit da lade katba ngi lah” kala ong.

Ka Kong Venetia ka la ong ba kane ka jingmih surok ki longkmie ka JAC bad ki nongialam ka GTF kam dei ka jingsdang hynrei ka dei ban pyni ia ki paidbah ba ka ki khlem shongthait ban iakhun naduh ka sngi nyngkong.

Haba kynthoh ia u Myntri ka tnat Tourism u Bah Paul Lyngdoh, ka Kong Venetia ka la ong, ba ka jingkren jong u ba ym donkam ban iam ka pynpaw ia ka jingbym sngewthuh ia kaei kaba ki kmie jong ka katei ka thain ki iakynduh bad ka long kum ka jingthombor shimet ia ki.

“Nga kwah ban kren shai khamtam eh ïa u Myntri ka tnat Jngohkai Pyrthei, Bah Paul Lyngdoh, uba dei u 12 bor, kumno u lah ban ong ba ym donkam ban iam ne jaw ummat? Hato u sngewthuh ïa kaei kaba ngi ki kmie ngi mad marwei marwei? Kam dei ban don kano kano ka jingkynthoh shimet pyrshah ïa ngi,” ka la ong.

Ka la pynkynmaw ia ka mynnor jong u Bah Paul Lyngdoh kum u president ka KSU, bad ong ba ha kitei ki por ki paidbah ki shaniah ia u Bah Paul ban lumlang ia ki khun Khasi bad kylli kylla mynta, balei ba uta u juh u nongialam mynta u ieng pyrshah ia ki.

“Balei mynta u pyrshah ia ngi, u byrngem ia ngi lyngba kita ki buit jakhlia jong u,” ong ka Kong Venetia. “Sngewbha wat byrngem ia ngi ki paidbah, wat pyntieng da ki buit jakhlia jong phi, sngewbha buh ia ki buit jakhlia jong phi ha iing jong phi.”

Wat la u Bah Paul u don shabar ri, hynrei ka Kong Venetia ka la ong ba ka khubor ka dei ban poi sha u bad ka JAC kam shongthait.

Halor ki tyllong um, ka Kong Venetia ka la ong, ba ka pynsngewsih ban iohi ia u briew uba la ieid ia ka shnong ka thaw, mynta u pyndonkam ia ka shuki ban byrngem kylla ia ki paidbah nong shong shnong.

“Lada u Bah Paul um don ha ka shuki mynta, un jin da don ryngkat bad ngi mynta namar ba u dei u briew uba ieid ia la ka shnong ka thaw ha kiwei ka por, hynrei mynta u ha ka shuki, ka shuki mynta lehse ka la nang khlain shuh shuh ban byrngem, ym tang ia ngi ki paidbah ka Raid Laban hynrei u la byrngem ia ka Jylla baroh kawei”.