Kam don jingiakren bhah shuki ia ki MLA UDP shwa ban leit iasoh BJP: Conrad

Hapdeng ki khubor ka jingiakhnium hapoh ka Meghalaya Bharatiya Janata Party (BJP) halor ka jingshah leh lyndet ha ka jingpynkylla thymmai ia ka Kynhun Myntri, u Myntri Rangbah u Conrad K Sangma hynne ka sngi ula pynshai ba kam shym la don kano kano ka jingkular ban pynrung Myntri ia 8 ngut ki MLA ka UDP ki la iasoh BJP.

Haba kren shaki lad pathai khubor u Conrad ula ong, “Ha ka por ba ki jingiakren ki la mih haba sdang halor ka jingleit iasoh jong ki, ia kane ka kam ngi khlem iakren satia, ka dei beit ka rai ha ka kyrdan ki MLA ka UDP ban iasoh BJP, ka jingiakren ba ha kano kano ka rukom ruh halor ka jingpynrung Myntri kam shym la don satia”.

U Conrad ula iathuh ba ka Sorkar Jylla kam shym la don bynta ha kita ki jingiakren bad kam shym la don ruh ka jingaiktien ba pan ia ka shuki Myntri.

Ula iathuh ba ka jingkyrpad ban ai jaka lem, kala mih tang hadien ba ka jingdon paid ha ka BJP kala kiew.

“Hooid, nga la ioh pdiang ia ki phone call ba kyrpad ba ka dei ban don ka kynja jingpynbeit kat haba lah namar ka jingdon nombor jong ki, kala kiew na ka 2 sha ka 10 bad kata ruh kila kyrpad ba lada ka Sorkar Jylla bad u Myntri Rangbah ki lah ban khmih hangno ba lah ban ai jaka lem” ula ong.

U Myntri Rangbah ula ong ba ka jingpynrung dkhot ha ka kynhun Myntri kam dei kaba suk namar ka jingduna u nombor.

“Nga la pynpaw shai dar ba haba phai sah ka kynhun Myntri ngi don da u pud ban pynrung bad baroh ki jaka lah dep thung briew. Kumta kam long kaba suk ia ngi, hynrei kat kaba lah hi na ka liang jong ngi, ngin iadon ryngkat beit ban iatreilang bad ki paralok” ong u Conrad.