Bam smai u Bah Paul kum u Myntri sorkar, ka bhah kam hadien 2 sngi ong MR

U Myntri Rangbah ka Jylla u Conrad K Sangma ula ong, hapoh ar sngi un shim rai ban ai bhah kam ia u Bah Paul Lyngdoh kum u myntri sorkar thymmai ba la bam smai hynne ka sngi.

U la ong, ba u President ka UDP u Bah Metbah Lyngdoh ula iehnoh kum u Myntri da lade khlem kano kano ka jingpynbor na ka Liang Synshar.

Halor ka jingkylli u Bah Paul Lyngdoh un ai ia ka kam jngohkai u Conrad Sangma ula ong, “Ngan sa shim rai ha ki khyndiat sngi ban wan, kumta ai lad ia nga ban leh ia katei bad shisien ba nga lah dep leh ia katei bad kaei ka jingbhah kam kaba yn sa aiti yn sa pynbna”

Ula ong ruh ba ym pat shim satia ia kano kano ka rai kaba khatduh, hynrei shisien ba u lah pyndep ia katei yn sa pynbna paitbah ha kaba iadei bad ka jingbhah kam ia ki myntri sorkar.

Halor kylli la u don jingthmu ban pynrung ruh ia kiwei pat ki MLA ha ka kynhun Myntri, u Conrad ula jubab da kaba ong “Lada nga ioh ban pynrung sa 5-6 ngut shuh shuh ki myntri sorkar bad lada ka riti synshar ka ri ka ailad ia nga, kumta ngan pynrung shuh shuh ia kiwei pat ki myntri sorkar, hynrei kumba phi tip, ka don ka jingbuh ia u pud ha kaba iadei bad ka nombor jong ki myntri, kumta ngi hap ban trei ha ka rukom jong ka jingdon 12 ngut baroh”

Ula ong ba kam long kaba suk bad kam long kaba lah ban pynrung shuh iano iano ruh na kano kano ka seng sai pyrthei ne wat na ka seng NPP ruh ha kane ka kynti kaba mynta bad ka ong ba lada ka jinglong jingman ka neh hi kumjuh, kumta kane ka sorkar bad kine ki myntri kiba mynta kin pyndep ia ka samoi treikam ka jongki.

Halor ka jingkylli, la ka don kano kano ka jingpynbor ia u President ka UDP u Bah Metbah Lyngdoh ban hiar shuki kum u Myntri Sorkar, u Myntri Rangbah ula ong “Em kam don kum kata. Ban kren hok, teng teng ha ka saiñ pyrthei, ym dei ba ngi lah ban shim tang ïa ki rai kiba pynsngewbha ïa baroh ne kiba ngi sngewkmen ban shim. Teng teng donkam ban shim ïa ki rai kiba eh shisha. Ban kren shai, kam long kaba suk ïa ngi ruh ban shim ïa kum kine ki rai. Kam dei ba ngi kwah ban shim ïa kum kine ki rai, hynrei ki jingjia kila long kumta bad ha ka saiñ pyrthei bad ka jingsynshar paidbah, ngi donkam ban shim ïa ki rai kiba eh”.

“Haba phai sha ka rai jong u Bah Metbah, kadei tang ka rai shimet jong u hi. Kam shym la don kano kano ka jing pynbor na ka liang jong ngi. U don ka jingsngew ba ki 11 ngut ki MLA kila mih noh na ka seng, kumta ula sngewdei ba um dei shuh ban long shi bynta jong ka Kynhun Myntri” la ong u Myntri Rangbah bad ka bynrap “Ula ïakynduh ïa nga bad u la pyntip ïa nga ïa kane ka rai jongu. Nga ruh nga la ong ba ha kum kane ka jinglong jongka kam, ka jingkheiñ ïa ki nombar bad ka jinglong jong ka saiñ pyrthei ka long kaba eh ïa baroh. Kumta, haba u la pyntip ïa nga bad aiti ïa ka shithi iehnoh kam, nga la pdiang ïa ka jingiehnoh kam jong u”.