Pyllait u Bah FR Kharkongor ia ka jingrwai ‘HER SHA KA THONG’

U heh ophisar ka Jylla u Bah FR Kharkongor ula pyllait paitbah ia ka thup jingrwai ‘Her Sha Ka Thong’ jong ka kynhun ki kaitor bad duhalia ba la jer ‘Da-La-Riti’.
Haba kren ha ka jingialang u Bah FR Kharkongor ula iaroh ia ki jingrwai jong ka ‘Da-La-Riti’ bad ula kdew ruh ba ka long ka lad ban pathai ia ki jingrwai tynrai lyngba ka snurpathai Gungunalo, khnang ba ki paidbynriew kylleng ka pyrthei kin ioh lad ban sngap ia ki jingrawi Khasi tynrai.
Ka kaitor nongialam jong ka kynhun, ka Dalariti Kharnaior ka la iathuh khana ia ka lynti ba dap tang da ki raieh raidam shwa ban poi sha ka thong ba la lah ban pyllait syndon ia ka thup jingrwai ‘Her Sha Ka Thong’.
Ha ka sngi pyllait paidbah ia ka thup jingrwai la ia don ryngkat ruh ki kynrem lyndan jong ka surrwai surtem kynthup ia u Bah Lou Majaw, Rudy Wahlang, Kit Shangpliang bad Daminot Wankhar.
Kiba la iashim bynta ha kane ka sngi, ki kynthup ruh ia u N Munish Singh u Zonal Director ICCR, kum u symbud kongsan, u Paiem Laborious Manik Syiem kum u kongsan kyrpang bad kiwei kiwei ki kaitor bad barikor jong ka jylla.
Ka thup jingrwai ‘Her Sha Ka Thong’ kadei ka kyrteng ba bit ba biang palat ha kata ka sngi ba ka kynhun ‘Da-La-Riti’ kala tur bad iaksaid lyngba ki byllai ki diengpynkiang haduh ba kin da lah ban long ka kynhun kaba la ioh jingithuh na kylleng bad khamtam ban shah jied ha ka snurpathai Gungunalo na ka bynta ban pynphriang ia ki jingrwai sha satlak pyrthei.
Ha kane ka sngi khraw la wan pynshngaiñ ruh da ka kher rangbah jongka snurpathai Gungunalo, ka Sherley Singh kaba la batai bniah shaphang ka bynta jong ka Gungunalo ha kaba pynphriang ia ki jingrwai khnang ba ki nongrwai kin ioh kamai da la ka umsyep lajong khlem da shah knieh bainong ha ki nongkhaii.
Kum shi bynta ban pynshlur bad ai mynsiem ia ki kaitor bad duhalia batbit ha ki sur tynrai Khasi ka ‘Da-La-Riti’ kala pynkup burom da ki khusnam ia byllai ki kaitor bad duhalia ba kynthup ia ki samla Batlador Khongnoh, Shibor Mawkon, Nashlemi Lyngdoh, Haniel R Kharlukhi, Jeremy B Mawlong, Redeemson Pakma, Bruceson Lyngdoh, Johanan Lyngdoh, Balamphrang Kharbuli, Gideon Z Lyngdoh, Iohbor Rngikseh, Franky Mylliemngap, Aurilia Mawlong, Ofilia M Kharnaior, Marbakordor Syiemlieh, Heimonmi Phawa, Mebabhaboklang Marbaniang, David Rogers Dhar, Elisheba Khongthaw, Fulvia N Kharnaior, Ethan Wanpynshngaiñ Kharnaior, Nangteiskhem Shabong, Silvereen S Kharnaior and Dawanshisha Kharnaior.
Ka thup jingrwai ‘Her Sha Ka Thong’ kan long u mawjam sha ka thong jingjop bad ka nam ba la prat lynti bad iaineh ban kyntiew ia ki sur tynrai Khasi da ka kynhun ‘Da-La-Riti’.