Hab sah iing wai ki nongtrei ka Hospital Mynnar Jirang, mad jingeh ki nongpang

Ka sorkar jylla haba ka phah ia ki nongtrei la ha sor ne nongkyndong ka ju pynbiang ki tiar ba donkam ha ophis ka jaka sah ka um bad kiwei kiwei, hynrei kaba lyngngoh ki nongtrei jong ka State Despensary Hospital, Mynnar Jirang, Ri Bhoi Distict ki hab ban sah iing wai haduh mynta.
Ha ka jingiakren ki Doctor ba dei peit ia katei ka hospital ki la iathuh ki nongtrei baroh naduh ki Doctor bad kiwei kiwei ki hab ban sah iingwai, namar ki jaka sah ki la pra bad jot lut na ka jingjia syllad ka eriong naduh u bnai Lber, 2026. Kumta ki nongtrei ki kynduh jingeh ha ka liang ban ai jingsumar ia ki pang khamtam haba don ki jingjia aksiden bad kiwei ki nongpang ba donkam kyrkhieh ban ai jingsumar.
Halor kane la iathuh na ka liang ki bor pyniaid ka Hospital ki la ai jingthoh sha ka sorkar ban pynbha noh ia kitei ki iing ba shah rat eriong ban suk ki nongtrei hynrei haduh mynta la palat phra bnai ka sorkar kam shym la pynbha satia.
Ha kajuh ka por, ki riew rangbah ka shnong ki la iathuh ki la ai jingthoh sha ki bor sorkar ban pynbha kumjuh sha u MLA/MDC ban maramot kloi ia kitei ki iing ba shah syllad eriong ban suk ki nongtrei bad kumjuh ki nongpang ba wan shah sumar. La iathuh kaba ki pyndonkam mynta ban ai jingsumar ka dei iing thymmai bad kam biang satia ba ka rit namar kitei ki iing rim ki la jot bad pra lut bad la donkam ia ka sorkar ban shna thymmai na bynta ka jingbit jingbiang ki nongtrei bad paidbah.
Kum ban pynpaw ia ka State Despensary ha Mynnar Jirang, Ri Bhoi District la shna da ka sorkar Assam ha ka por bym pat ioh ia ka jylla Meghalay bad ka dei kawei na ka jaka sumar ba la rim tam ha ka thain bad ka jylla. Ha ka jingshisha ka dei ban long ka jaka sumar ba biang lut ki lad ai jingsumar bad ki jaka sah ki nongtrei kumba long kiwei ki jaka sumar ha jylla, hynrei kumba long mynta katei ka jaka sumar ba la rim tam ka dangsah dien haduh mynta.
Ia kane ka hospital la pyniaid da ka Karuna Trust, ka kynhun NGO lyngba ka jingiateh Public-Private Partnership (PPP) bad ka sorkar Meghalaya, kynthup 10 tylli ki CHC ha Jylla da ka jingthmu ban pynkhlain ki lad ai jingsumar ha ki thain kyndong.