Bteng ka Assam ban klun jaka ha Meghalaya

Ki nongialam ka Hima Jirang hynne ka sngi ki la leit ban jurip ia ka jingkieng ba la wan tei da ka Assam ha shnong Umshru, kaba hap hapoh ka Hima Jirang bad kaba dei ruh kawei na ki shnong khappud hapdeng ka Meghalaya bad Assam. Ia kane ka jingjurip la ialam da u Bah Sranly Wahlang, Secretary, ha ryngkat ka jingdon u Bah R.J Wahlang, Acting Syiem, u Bah S. Wahlang, Syiem Khynnah lem bad kiwei kiba dei ki nongkitkam ka Hima Jirang.

Katei ka jingleit jurip da ki briew ka Hima Jirang, ka dei ruh hadien ba ka Hima Jirang, ka la buh jingujor sha ophis u Deputy Commissioner ka Ri Bhoi, na bynta ban pyrshah halor ka jingwan tei jingkieng ka Assam ha katei ka shnong, kaba dei ka shnong, ki briew na Meghalaya bad na Assam ki kam trai. Haba kren sha ki lad pathaikhubor, u Bah Sranly Wahlang, u la ong ba katei ka jingjurip ki briew sorkar Meghalaya bad Assam sha katei ka jaka, ka dei hadien ba ka Hima Jirang, ka la leit ban ujor sha u DC Ri Bhoi. U Bah Sranly Wahlang, u la ong ruh ba la sngewthuh ba ia katei ka jingkieng la pynshna da ka Assam lyngba ka tnat PWD, hynrei ha ka jingiakren hapdeng ki briew na Assam bad Meghalaya, kam ikop poi shaei shaei ruh, namar ki briew Meghalaya ki kam ba ka dei kaba hap sha Meghalaya, katba ki briew na Assam, ki kam ba ka dei kaba la hap sha Assam.

Hynrei ha ka jingsngew ka Hima Jirang hi ka long, ba katei ka jaka ka dei kaba dang hap sha Meghalaya bad kumta kum ka Hima, ngi dawa ba ia katei ka kam dei ban pynsangeh shwa bad kin pyntrei tad ynda la don ka jingiakren hapdeng ka Meghalaya bad Assam. Ha kajuh ruh ka por, ngi dawa ba lada ka Assam kan kwah ban shna jubor ia katei ka jingkieng, ngin nym don kano kano kaba khang pyrshang, hynrei kam dei pat ban thoh ha ki Mawnongrim ba ia katei ka jingkieng la tei lyngba ka sorkar Assam, hynrei ka dei ban don ka soskular hapdeng ka sorkar Meghalaya bad Assam, ba katei ka jaka kam dei ban kam trai da mano mano ruh, u la ong.