Ka tamasa bam ‘Niangphlang Hima Lyngiong sha ka Mawpuri Festival ban ai nam i’u maw pawdur puri

Ka Hima Lyngiong ka la pyllong ia ka tamasa bam niangphlang la katto katne snem hynrei mynta ka snem, ka la pynkylla long ban ai kyrteng noh kum ka Mawpuri Festival ne ka Tamasa Mawpuri ban ai nam ia u maw uba paw dur puri uba don ha ka Hima.
Ka jingthmu ka long ban pynpaw bad pynkylla spah ia ka jingitynnad kaba la ai ka mariang kiba don hapoh ka Hima ban khring ia ki briew ban wan peitkai.
Ia kane ka tamasa la ai nam kum ka tamasa bam niangphlang namar ba katei ka thain ka dei kaba pawnam bha ka jingbang u niangphlang.
Nalor kiwei ki jait jingdie ba bun jait, ki jait jingbam tynrai, u niangphlang u dei uwei na ki jait jingbam ba kham kongsan ha kane ka tamasa.
Hynrei katkum ka jingiakren bad ki nongdie niangphlang kila pynpaw ba mynta u snem, ki ioh duna bha u niangphlang na lum ym kum mynshem snem ha kaba ki ioh bun kilo bad na ka jingioh duna, ka dor ruh ka khem rem noh mynta u snem.
Katkum ka jingiakren bad ki, ka tamasa ka la ai jingmyntoi shibun ia ki namar ba ki ioh ban kamai ym tang na u niangphlang hynrei na kiwei kiwei ki jingdie ha kaba ki briew ki la nang wan bun katba nang iaid ki snem.
U MLA ka thain u bah Beyond Matthew Kurbah ula pynpaw ba kane ka tamasa ka long kongsan ban kyntiew ia ka kam jngohkai na ka bynta ban kyntiew ia ka ioh ka kot jong ki briew namar ba ka thain ka don ka mariang ba itynnad. Ula kyntu ia ki briew ban sangeh noh ban siat ia ki mrad ki mreng, bad ban thang khlaw kiban pynjot ia ka mariang.
Ha kajuh ka por, u Myntri sorkar bah Wailadmiki Shylla ula ong ba ka sorkar ka don ha syndah jong ki paidbah ban ai ka jingkyrshan ban kyntiew ia ka kam jngohkai bad ka ioh ka kot hynrei ula kyntu ruh baki paidbah ki dei ban pdiang ia kiba wankai ne tourist, ym ban beh pynban kum ki mynder namar ba kiba wankai ki wan ai pisa bad kim sah kim knieh ia ki hok ki trai shnong.
U la ban jur ba ka jingkhuid ka dei ka atiar ba kongsan ban kyntiew ia ka kam jngohkai. Katba na ka liang u Secretary ka Hima Lyngiong u bah Detral Marbaniang ula ong ba kum kane ka tamasa ka la iarap ban pynbna ia ka jingdon ka thain ia ka spah mariang ban khring ia kiba wankai nabar kylleng bad kane ka la iarap ban wanrah jingmyntoi ia ki nongshong shnong.
U la ong ba saw snem la ai kyrteng kum ka Niangphlang festival hynrei ha kane ka kynti, la ai kyrteng kum ka Mawpuri Festival ban kham pyniar ia ka jingmut jong kane ka tamasa kaba iadei bad ka kam jngohkai.