Ka sorkar lyngba ka tnad Kam Jngohkai ka jylla hynne ka sngi ka la lum ia ka jingialang ban pynshai haba ia dei bad ka Projek Shillong Ropeway kaba la pyntrei kam da ka tnat kam jngohkai lyngba ka Meghalaya Ropeway Development Authority (MRDA).
Ia kane ka jingialang la lamkhmat da ka Commissioner and Secretary ka sorkar jylla ka kong RM Kurbah bad u Director ka Meghalaya Ropeway Development Authority u bah Cyril Diengdoh, ryngkat ka jingdonlang ki Rangbah shnong na ki 7 tylli ki Dorbar bad ki nongshong shnong ka Laban Pyllun hapoh ka JAC, nalor kiwei de.
Ka Commissioner Secretary ka kong Kurbah ka la ong ba kane ka projek kam don jingktah ia ki umbam umdih namar ba ka projek ka la pajih na ki tyllong um.
Ka la ong ba u Lum Shyllong ne u Lum ba kyntang un ym shah ktah eiei namar ba ka jngai kumba 3.5 km eiei na ka projek ban buh ia ka Ropeway.
“Kane ka projek la pyrkhat da ka sorkar hadien ba ka sorkar ka la shem ba ki nongpyniaid ia ka View Point ki iakynduh jingeh. Kane ka projek la shna khnang ban ailad ia ki Nongwan peitkai ban iaid da kawei ka lynti khnang ba kin lait ban iaid na ka Airforce. Namarkata la pyrkhat ban pyniaid noh da ka Ropeway kaban shim por tang kumba 5 ne 10 minit,” ong ka kong Kurbah. Ka kong Kurbah ka la ong ba kane ka projek kan wanrah ruh shibun ki kam ha kaba ki don bun ki Homestay, ki Dukan ki ban mih ha kitei ki jaka bad kiwei de ki jaitkam namar kane ka thain kan sa kiew.
“Kane ka projek kam dei kaba shu jia ryngkhat hynrei ka dei kaba la plan da ki snem bad la ioh ia ka Clearnce na ka liang ka Forest, Dorbar, Airforce bad ngi ladep pynbiang lut ia baroh ki jingdonkam namarkata ngi la iaid shakhmat ia ka projek,” ong ka kong Kurbah.
Katba na ka liang u bah Cyril ula pyntip ba ka jinglut pisa jong kane ka project ka long T.151 klur, kaba la bei tyngka lyngba ka External Aided Project na ka New Development Bank (NDB) bad ka Sorkar India.
Ula batai ba ka jingjrong jong ka lynti jong ka ropeway ka long tang 930 meter, kaba hapoh ka shi kilomitar, bad kan long ka mono-gondola ropeway kaba don ki cabin ban kit ia ki nongleit nongwan.
Ula pynshai ruh ba kane ka project ka long kawei na ki projek Green Mobility, ka bym don ka jingpynmih ia ka lyer kaba sniew.
“La pynwandur ia ka Shillong Peak Ropeway Project na bynta ban pynsuk ia ka jingiaid jong ki nongwan jngohkai, ban kyntiew ia ka kam jngohkai pyrthei bad ban wanrah ia ki lad kamai jakpoh,” ong u bah Cyril.