Leit iasoh NPP 3 ngut ki MLA UDP, sah marwei u Bah Metbah

Ka jingkylla ka sain pyrthei ha Meghalaya, ka party National People’s Party (NPP) ba ialam ia ka sorkar MDA kan nangkhlain bad ka jingdon ki MLA bad kan nangkiew na ka 33 sha ka 36 ngut.
Katkum ka jingtip ba la ioh lai ngut ki MLA ka United Democratic Party (UDP) ki la don jingmut ban leit ban pyniasoh sha ka seng sain pyrthei NPP la shai ka Lah sngi u Blei.
Kine ki 3 ngut ki MLA ki kynthup ia u MLA ka West Shillong uba dei u Myntri sorkar barim u bah Paul Lyngdoh, u MLA ka Mawkyrwat u bah Renikton L Tongkhar bad u MLA ka Mookaiaw u bah Nujorki Sungoh.
Katkum ka tyllong khubor kine ki 3 ngut ki MLA ki don ka jingthmu ban iakynduh ia u Lamphang u Thomas A Sangma la shai ka Lah sngi u Blei ban aiti ia ka shithi halor ka jingleit pyniasoh sha ka NPP.
Kane ka jingkylla ka sain Pyrthei ka long hadien ba u Lamphang ula ai ka jingithuh ia ki 8 ngut ki MLA UDP ba la leit iasoh bad ka Bharatiya Janata Party (BJP) dang shen bad mynta ka UDP ka la hiar ka jingdon ki MLA na ka 12 ngut sha ki 4 ngut.
Lada kane ka jingpyniasoh 3 ngut ka iaid shakhmat, u President ka UDP uba dei u MLA ka Mairang u bah Metbah Lyngdoh, un sah marwei ha ka iing Dorbar kum u MLA ka UDP. U bah Metbah Lyngdoh ia mynta u dei u Myntri sorkar bad u bat ia ka tnad Bording.
Kine ki lai ngut ki MLA, ki long ar na ka lai bynta na kiba dang sah ha ka UDP ha ka Dorbar, kaba la biang ia ka jingdawa ba dei ban don 2/3 bynta ban pyniasoh katkum ka Tenth Schedule jong ka Riti Synshar ka ri.
Kane ka jinglong jingman ka sain hima ka pynpaw ba ka jingtylli ki seng riewlum ka la kut ha jylla Meghalaya.