Plie u Bah Sanbor ia ka Cultural Complex ka Seng Khasi Raid Laban ba T.9 klur

Hadien da ki phew snem, Seng Khasi Raid Laban ka la ïoh ïa ka ïingseng kaba bit ba biang kaba la weng noh ïa ki jingeh haba ïadei ka jingbymdon ka jaka ban pynlong ka nguh ka dem kumjuh haba don ki kam jingialang ne jingiakynduh lang ki para dkhot ne nongialam.

Ïa kane ka jingtei ba lai mala bad kaba bun kamra la plie da Myntri Sorkar uba dei ruh u MLA ka South Shillong Constituency u Bah Sanbor Shullai ha ka jingïadonlang u Satinder Kumar Bhalla, Secretary NEC bad u Richard J.Lalnunkima Dy. Adviser ka NEC, ki Rangbah na ka Seng Khasi Kmie, ki Nongïalam ka Seng Khasi Raid Laban ha ryngkat ki paidbah nong shong shnong.

Ïa katei ka ïingseng bathymmai la ai kyrteng da ka Cultural Complex Seng Khasi Raid Laban bala kyrshan da ka North Eastern Council (NEC) kaba kot haduh T. 9.28 klur.

Haba kren ha kane ka sngi, u Bah Sanbor u la pynpaw ba hapoh ka shnong Laban la don lut ki kynun niam ne seng kiba shong ba sah bad ki don ha la ka jong ka jong ka jaka ban ïa pynlong jingduwai lane ban shong pyrkhat kam.

U Bah Sanbor ula ong ba haduh tang ka Seng Khasi Laban kaba dei ka seng trai ri kam don ïa ka jaka pynlong ïa a nguh ka dem bad ka duwai ka phirad.

U la pynkynmaw ba ki don bun ki jaidbynriew ha ka ri bad ha ka Jylla, ki don la ka jong ka rukom riam, ka ktien ka thylliej, ki riti Dustur bad ruh ka jingngeit , hynrei ban don ka jingïaburom markylliang namar ba ïa ki briew la pyrshad tang da kawei ka Mynsiem.

U la ïathuh ba kane ka la pynlong ïa u ban sngewkhia bad ban shimkhia hi ruh ha kaba ma u lem bad ki katto katne ki riew Rangbah ki la sdang ban wat ïa ka jaka naduh u snem 1996-1997 bad la ïoh ïa ka jaka kaba heh kumba 35,000 Sqr ft.

U Bah Sanbor la pynpaw ka jingsngew nguh ïa ki riew rangbah kiba la don bynta ha ka por ba ki ïaleh ban wat ïa ka jaka bad ban ïoh tei ïa katei ka jaka kumba ka long mynta ha kajuh ka por u la la aiti ïa ki kot dulir jaka lem u shabi jong ïingseng ba thymmai sha ka Seng Khasi Raid Laban.