Wat hadien ka jingpyniakhlad ia ka Synshar bad Bishar

U Nongialam ka Liang Pyrshah bad u Myntri Rangbah barim ka jylla u Dr Mukul Sangma ula ong, ka lad ban ioh ia ka jingbishar hok ka la kylla long kaba rem dor bha bad ki bym kot bor shuh shuh na bynta ki riew paidbah bad ula iawer ia ki bor synshar ba ki dei ban wanrah ia ki jingkylla kynthup ia ki iingbishar ne ka Judiciary.

“Ngi dei beit ban sngewthuh ba kiba shah niew beiñ bun sien hi ki dei kiba tlot bad kiba nongleh beiñ ki dei beit ba khlain bor. Kumta ha kane ka rukom treikam ba ngi don, ka bor ka jingai ia ka jingbishar ba hok ruh ka dei ban don ia ka jingkylla” la ong u Dr Mukul.

Ula ong ka jingwanrah ia ki jingkylla ia ka jaka treikam dei ban kynthup lang ia ki iingbishar bad ka pynkynmaw ia ki por ha jylla ba ka la pyniakhlad ia ka bor synshar bad ia ki iing bishar.

“Ka dei ban don, ngi kren shaphang ka jingwanrah ia ki jingkylla ia ki jaka treikam bad ka jingwanrah ia ki jingkylla ia ki jaka treikam ka kynthup ruh ia ki iingbishar. Dei na kane la phiah noh la ka jong, ia ka bor synshar na ki iingbishar bad ka Meghalaya ka dei kawei napdeng ki jylla kaba sted tam ban pyndep ia kane ka bynta baroh kawei jong ka jingphiah ia ka bor jong ka kam synshar bad ki iingbishar. Balei? Namar ba ngi angnud ba ngin leh ia kaei kaba ngi ialap bad ngi lah pyni ruh ia kane da ka kam” ula ong.

U Dr Mukul ula ong, ba wat hapdeng jong ka jingwanrah ia ki jingkylla, hynrei ka jingai ia ka jingbishar kaba hok kam shim la lah pat ban poi sha kiba bun.

“Kumta ka jingwanrah ia ki jingkylla ia ki jaka treikam kiba lah dep leh, mynta da ka jingiaid baroh jong ka rukom treikam, ka la pawshai ba ka lad ban ioh ia ka bishar ka long ba rem dor bad kylla ruh kum ka bym lah ban kot bor shuh. Kumta ki jingwanrah ia ki jingkylla ba heh ki long kiba donkam bha” ula ong.

U la iawer ruh ia ka jingdonkam ban don ia ka jingiatai ba iar ha kylleng ki jylla bad ha ka Ri.

“Ia kane hap ban iakren bad iatai ha kylleng ki jylla bad ha kylleng ka ri bad ngi dei ban pynmih eiei ka ban lah ban pynlong ban ioh ia ka lad sha ka iing bishar ba hok na bynta ki riew paitbah” la bynrap u Sangma.