Plie u MLA ia ka skul thymmai ha shnong Umdohkha

U MLA ka Nongpoh u bah Mayral Born Syiem uba dei ruh u Chairman ka Meghalaya State Health Advisory Boarding, Govt. Meghalaya ula leit ban plie paidbah ïa ka building skul ba thymmai jong ka Umdohkha Nongtluh Government LP School.

Ka jingtei ia katei ka building skul, U MLA ka Nongpoh u bah Mayral Born Syiem u la sdang ban buh ïa u mawnongrim ha u snem 2024 bad tang hapoh ki 2 snem katei ka building skul ka la ïeng Pura ha ka dur kaba itynnad bad ka ban pynjuh ia ki khynnah ban leit tista sha skul.

Ïa katei ka building skul thymmai la tei haka jinglut kaba 44 lak tam kaba la pynmang pisa lyngba ka Mission Education jong ka tnad pule puthi ka sorkar jylla.

Ha kane ka sngi, nalor u Bah Mayral Born Syiem, kum u kongsan la ïadonlang P.P. Yadav, SDSEO, Ribhoi, u bah Shalping Khymdeit Rangbah shnong Umdohkha, u Bah Beding Syngkli Chairman Ka School Managing Committee, ki nonghikai, ki kmie ki kpa, ki khynnah skul bad ki nongshong shnong.

Katkum ka jingiathuh da ki nongkren ha katei ka jingïalang, la ong ba ïa katei ka skul la sdang naduh u snem 1952 da ka Balang bad lyngba ka jinglum ïa u Khaw kham la lah ban pyntyllun ia katei ka skul.

Hadien nangta la aiti ia katei ka skul ban pynïaid noh da ka Block bad nangta la aiti pat sha ka District Council bad mynta ia katei ka skul la shimti ban pynïaid da ka Sorkar Jylla bad ïa kaba mynta katei ka skul ka la sdang ban kiew bad ka jingdon ki khynnah skul mynta ki don haduh 126 ngut.

Haba kren ja katei ka jingïalang, u bah Mayralborn Syiem u la ong ba ka long ka jingkmen iaka shnong bad ia u kum u nongmihkat ban ioh plie noh iaka building skul kaba thymmai kaba dei kawei naki jingangnud bad ka jingthrang jong ki nongshong shnong ka Umdohkha.

U la iathuh ruh, ba ïa kane ka building skul la buh mawnongrim ha u snem 2024 ban sdang tei ia kane ka skul ryngkat ki jingmut jingpyrkhat ban pynurlong ia ka jingangnud jong ki kmie ki kpa kiba phah pule ia la ki khun ki kti.

U bah Mayral u la iathuh ruh, Ka jingpyrshang jong ka sorkar jylla lyngba ka tnad pule puthi ka long ba ki skul kiba don haki Shnong bapher bapher jong ka jylla ki dei ban don iaki kamra klas kiba bit ba biang, bad kane ka building thymmai kaba ioh ban plie noh ka dei kawei naki jingthrang jong ka sorkar.

Ka jingioh ka shnong Umdohkha ia katei ka building skul thymmai ka dei kawei naki sienjam jong ka Sorkar jylla ban kyntiew iaka pule puthi ha ki shnong ki thaw bad ka la long ruh ka jingkyrkhu kaba khraw iaki nongshong shnong naba ki la ioh ym tang ïaka building skul hynrei ki ioh ïa ka jaka ban saiñ dur naka bynta ban ioh iaka umjer kshiar haka lawei jong ki khun ki kti jong ka shnong Umdohkha.