U Bah Hek u dei tang MLA um dei u President BJP, ym don MLA NPP ban leit iasoh BJP: Prestone

U Symbud Myntri Rangbah ka Jylla uba dei ruh u President ka NPP Meghalaya, u Bah Prestone Tynsong, u la kyntait ïa ka jingong jong u MLA ka BJP na Pynthorumkhrah constituency u Bah AL Hek, ba don ki MLA na Garo Hills kiba dei na ka NPP kiba kwah ban leit sha ka BJP.

Haba jubab ïa kane ka jingkren jong u Bah Hek, na ka liang u Bah Prestone ula ong ba ka jingkren jong u Bah Hek ka dei tang ka jingphoh sniew, namar um dei u President ka NPP.

“Kane ka dei ka jingmut jong u Bah Hek, hynrei ngam mut ba u Bah Hek u dei u President ka NPP. Nga dei u President ka NPP bad nga ngeit ba nga tip kham bha ïa kaei kaba jia hapoh ka party,” u la ong.

U la ong ba ka NPP ka dang long kawei bad baroh 33 ngut ki MLA ka NPP ki dang donlang hapoh ka party.

“Lada phi kylli ïa nga, ngan ong tang kawei, ngi dang long kawei. Baroh 33 ngut ki MLA ba la jied jong ka NPP ki dang donlang bad ka party,” u la ong.

U Bah Prestone u la ong ruh ba haduh mynta um shem satia ïa kano kano ka jingïapher ne ka jingïakynad hapoh ka NPP.

“Haduh mynta ngam iohi ïa kano kano ka jingïapher. Ngam ngeit ha ki jingkren khlem nongrim, nga ngeit ha ka jingshisha. Kumta haba phi kylli ïa nga, sngewbha kylli ïa ka jingshisha bad wat shaniah tang ha ki social media, namar ka social media kam dei ka kot jingpynshisha,” u la ong.

Haba kylli shaphang ka jingkren jong Bah Hek ba don ki MLA na Garo Hills kiba kwah ban leit sha ka BJP, u Bah Prestone u la ong ba um kwah ban ai jingmut bun halor kane namar Bah Hek u kren na ka liang jong ka BJP.

“U Bah Hek u kren halor ka party jong u. Ngam kwah ban ai jingmut bun halor ka jingkren jong u. Lada u President ka BJP Meghalaya u ong kumta, te nga lah ban jubab halor kata. Hynrei u Bah Hek u dei tang u MLA,” u la ong.

U la kyntu ruh ïa ki lad pathai khubor ban wad jingtip beit na Bah Hek bad ban pynshisha pat ïa ka jingtip na u President ka BJP Meghalaya, ym ban shaniah tang ha ki jingtip kiba mih ha ki social media.

“Phi leit kylli beit ïa u Bah Hek bad pynshisha pat na u President ka BJP. Ngin hap ban peit ïa ka jingshisha, ym tang ïa ki jingkren ne ki jingtip kiba mih ha ki social media.”