U MP Rajya Sabha ka Meghalaya, u James PK Sangma ula kyrpad ïa ka Joint Parliamentary Committee (JPC) kaba peit bniah ïa ka Foreign Contribution (Regulation) Amendment Bill, 2026 ban pynlong ïa ki jingïakren bad ki kynhun bapher bapher ha nongbah Shillong.
Lah ban kdew ba u James PK Sangma, ula shah thung kum u Special Invitee sha ka JPC ban iakren bniah halor ka jingthmu wanrah jingpynkylla ha ka FCRA.
Haba kren sha ki lad pathai khubor u James ula ong, ba u la thoh sha u Chairman jong ka JPC uba long u MP Lok Sabha, u Dr Sanjay Jaiswal ban wan syllok bad ki kynhun bapher bapher ha Shillong.
“Nga la thoh sha u Chairman jong ka committee ban bha lada ka committee ka wan sha Shillong bad ïakynduh ïa ki kynhun bapher bapher, khnang ba kan long kaba suk ïa kine ki kynhun ban wan ïakynduh ïa ki dkhot jong ka committee,” la ong u James.
U la bynrap ka committee ka dang ïaid katkum ka por ban aiti ïa ka kaiphod shuwa ban kut ka dorbar tlang jong ka Parliament.
“Dang shen, ngi la don ki jingïalang halor ka FCRA, watla ngam long ban iathuh lut kaei kaba la ia kren ha kine ki jingïalang. Hynrei, ka committee ka dang ïakynduh ïa ki kynhun bapher bapher bad ïa bun tylli ki tnad treikam. Nga tharai ba ka jingbynta jong ka ka long ban pyndep ïa baroh ki kam bad ban aiti ïa ka kaiphod shuwa ban kut ka dorbar tlang,” u la ong.
“Ngi sngewthuh ïa ka jingdonkam ban pyndep kloi ïa kane ka kam, bad nga thikna ba hapoh ka jingïalam jong u Dr Jaiswal kum u Chairman, ngin lah ban pyndep ïa ka kamram jong ngi,” ula bynrap.