Ka Bangladesh ka khyrdop ban pyniaid iew ia ki mar shabar Ri: ong u Sniawbhalang

Ka tnad Commerce and Industries ka la jylla ka la pynlong ia ka Reverse Buyer Seller Meet (RBSM 2.0) ba-ar sngi ha ka State Convention Centre ha ka sngi Thohdieng ha kaba 300 ngut ki nongseng kam lajong na baroh ki district ka jylla ki la shim bynta bad 32 ngut ki nongthied na ka ri bad na bar ri ki wan sha ka jingialang.

Ka jingthmu ka long ban thaw ïa ki lad kamai thymmai bad ki lad shalan mar shabar ri na bynta ki Micro, Small bad Medium Enterprises (MSME) jong ka Jylla kum ka rynsan ban pyni ïa ki mar jong ki bad ban sngewthuh ïa ki jingdonkam ki ïew bad ban iaid ïa ki mar.

Haba ai jingkren ha ka jingialang u Symbud Myntri Rangbah ka Jylla u bah Sniawbhalang Dhar u la ong ba ka RBSM 2.0 ka long ka kum ka rynsan ban plie ïa ki jingkhang thymmai ia ki lad ki lynti na bynta ki nongseng kam seng jam ka Meghalaya ban pynïasoh ïa ki mar ka Jylla bad ki ïew ha kylleng ka ri India bad ka pyrthei.

Haba pdiang sngewbha ïa ki nongthied bad ki nongseng kam seng jam ba ïashim bynta, ula ong, ka jingdon jong ki karkhana na baroh 12 tylli ki district ka pyni ïa ka jingshaniah ba nangroi jong ki nongkhaii ka jylla bad ka jinglong ba kloi ban ïatreilang bad ki iew ba kham heh.

U la pynpaw ïa ki mar rep jong ka Meghalaya, ki tiar thaiñ kti bad ki rukom shna jain, ki marpoh khyndew bad ki mar khlaw, ki nongtrei kti ba tbit bad ki mar ki lah ban kyntiew ïa ka jingroi ki kam bad ka jingroi ka ïoh ka kot kaba neh.

U Bah Dhar ula pynpaw ba ka Jylla ka don u pud u sam bad ka Bangladesh ba jrong 443 kilomitar kaba long kum ka khyrdop sha ki ïew ki hat ha ka thaiñ shathie jong ka dewbah Asia. Ula kdew ka jingpynheh ia ka surok bad ka jingpyniasoh lynti rel lyngba ka Mendipathar bad ka jingpyniasoh liengsuin lyngba ka kad liengsuin Umroi kum ki jingtei ba kongsan ban kyntiew ia ka kam khaii pateng bad ki karkhana.

U la ong ki jingdon ka jong mariang ryngkat bad ka jingroi ka MSME ecosystem, lah ban pynkylla ia ki lad kamai ba kham heh ban ioh ia ki iew ki hat ha ka kam khaii.

“Bun na ki mar ka jylla ki sah kut da ki snem tang ha ki iew ki hat jong ka ri bad ki thaiñ. Hynrei mynta ngi dang trei ban pynkylla bad ka jingthmu kam dei tang ban pynmih kham bun, hynrei ban pynïaid iew bad ban poi sha ki nongthied ha kylleng ka ri India bad shabar ri,” ong u bah Dhar.

Ula ong ka RBSM ka dei ka rynsan ban pynsuk ia ki nongsengkam trai ri ban iakynduh bad ki nongthied na ka ri bad nabar ri ban sngewthuh kham bha halor ka jingkhmih lynti jong ka iew.

Haba ïadei bad ka International Reverse Buyer Seller Meet banyngkong eh ba la long ha u bnai Kyllalyngkot ula ong, kane ka jingthmu ka la wanrah ban iasoi 40 tylli ki MoU ha ki ka kam khaii bad ka la pynmih ïa ki lad ki lynti ba shongdor palat T.3 klur, ha kaba la ïashim bynta da ki nongthied na ki 15 tylli ki ri ha kylleng ki saw tylli ki dewbah. La ai lad ia ki nongsengkam na baroh 12 tylli ki district ban pyni ia ki mar jong ki sha ki nongthied ha ka pyrthei.

U la bynrap na ka jingmih banyngkong ka pyni ba ka rynsan ka lah ban pynkylla ia ki jingiadei sha ki lad jingkyrmen ban nangkiew ban pynlong ia ka RBSM 2.0.

U la kyntu ïa ki nongseng kam seng jam ba ïashim bynta ban pyndonkam ïa ka rynsan ban pyni ïa ki mar da ka jingshaniah bad ïatreilang bad ki nongthied ba wan jngoh khnang ban ïoh jingtip shaphang ki iew bad ki rukom treikam ba thymmai.

U la pynpaw ka jingsngewnguh ïa ka sorkar India halor ka jingkyrshan jong ka bad ula ong ba ka sorkar Jylla ka dang trei ban bud dien ïa ki jingthmu hapoh ka Jylla Meghalaya ban ai lad ki lynti ki nongseng kam lajong.

U la ong ka jingïatreilang ka long kaba donkam na bynta ka jingroi ki MSME bad pyntip ba ka tnad khaii pateng ka dang trei ïa ki polisi kiba thmu ban ai jingkyrshan ïa ki nongseng kam seng jam bad ban pynkhlain ïa ka rukom treikam jong ka Jylla.

Ula pynshlur ia ki nongseng kam ban peit ia ka kam kum ka jingpule ba iai bteng bad ban ym shah pynduh mynsiem, namar ka jingroi ba neh ka donkam ia ki nongseng kam ban iaid shakhmat bad ban ioh ki iew ba biang.

La khmih lynti ba ka RBSM 2.0 kan nang pynkhlaiñ shuh shuh ïa ki jingïadei bad ki ïew ki hat na ka bynta ki MSME ka Meghalaya ban kyntiew ïa ki mar ba la pynmih hapoh ka ri shabar ka Jylla bad ban thaw ïa ki lad ki lynti thymmai na bynta ka kam khaii, ka jingbei tyngka bad ki lad shalan mar shabar ri.

Ha ka jingialang la donlang u Commissioner bad Secretary, Commerce and Industries, u bah CVD Diengdoh, (IAS) Director Commerce bad Industries bah ML Wanshnong bad kiwei ki riew rangbah.