Ki Khana Shaphang ki Kynthei Nongrep ha jylla ki wan phai sha ki shnong lyngba ki dur bad ki phlim

Ka jingtip jong ki kynthei halor ka rep ka riang, ka jingtrei jong ki man la ka sngi bad ki jingshem jong ki halor ka jingkylla ka suiñbneng, ka rukom rep rukom riang, ka spah mariang bad kiwei kiwei ki bynta jong ka rukom im ki paid riewlum ki long ki mat pdeng jong ka prokram bad ba lah pyni lyngba ki dur bad ki film ha Mawstep, Khatarshnong Laitkroh Block, East Khasi Hills, Meghalaya, kaba la pynlong da ka Locavore bad ka North East Society for Agroecology Support (NESFAS).

La pynlong ïa kane ka prokram ha ka National Women Farmers’ Day, ha kaba la pyni biang ïa ki kam na ka Woman Farmer Projek jong ka

Locavore sha ki shnong bad ki paidbah kiba la noh synñiang ban pynlong ïa kane ka program. Kane ka la ai lad ïa ki nongïashim bynta ban peit ïa ki dur bad ka film, ban ïa mir jingmut halor ka jingshem jong ki, bad ban sam jingmut lang

Ka prokram ka la wanrah lang ïa 30 ngut ki dkhot shnong bad 50 ngut ki khynnah skul na shnong Mawstep bad ki 10 tylli ki shnong, kata Liarsluid, Nongwah, Mawstep, Nongtraw, Laitsohpliah, Dewlieh, Umsawwar, Itsohpair, Khweng bad Nongjngi. La donlang ruh ki Meghalaya Fellows ne ki nong lum jingtip ki ba don bynta ha ka projek kata i Ibapdianghun Myria bad i Queeneerich Kharmawlong, ryngkat bad ka kynhun NESFAS.

Ha ka Women Farmer Projek, ka Locavore ka la trei lang bad ka NESFAS ban pynlong ïa ki jingwad bniah bad jinglum khana hakaba iadei bad ka rukom im jong ki kynthei nongrep ha ki katto katne ki thaiñ jong ka Meghalaya. Namar ka jingtrei kaba la slem jong ka NESFAS ban pynpaw ïa ki sur jong ki riewlum ha ka thain Shatei Lam Mihngi jong ka India, khamtam ïa ki kynthei kiba long ki nongri bad nongpynneh pynsah ia ka spah mariang, ka bam ka dih, ka khyndew ka shyiap bad ki briew, ka ba pyni ruh iaka jingiatrei lang jong ki shnong.

Haba kren shaphang ka jingïatreilang hapdeng ka Locavore bad ka NESFAS, u Executive Director, u Bah Pius Ranee, u la ong: “Kaei kaba pynlong ïa kane ka jingïatreilang kaba don jingmut ka long ka lad ban rah ïa ki sur jong ki paidbah ha ki jaka shnong shabar jong ki shnong jong ki, bad ban thaw ïa ka jaka na ka bynta jong ki ha ka jingïakren kaba heh ha ka imlang sahlang. Ka bor jong ki lad pathai khubor kam dei tang ban ïathuh ïa ki khana jong ki briew; hynrei ka don ruh ka bynta ban pynkylla ïa kaei kaba ka imlang sahlang ka ñiew kum kaba kordor, ka jingtip jongno kaba donkam bad ki sur jongno kiba ïoh ban shah sngap.”

Ka Woman Farmer Projek ka la long kum ka fellowship, ha kaba hynriew ngut ki kynthei nongthoh khubor bad nongshna film kiba dang sdang ïa ka jingïaid lynti ha ka kam ki la ïoh jinghikai ha ka jingwad khana ha ki jaka trei bad ka rukom ïathuh khana, ban pynrung jingthoh ïa ki kam jong ki kynthei nongrep na Meghalaya, Madhya Pradesh bad Tamil Nadu.

Ki fellows na Meghalaya, i Ibapdianghun Myria (Audio-visual Fellow) bad i Queeneerich Kharmawlong (Writer-Researcher Fellow), ki la pynlut saw bnai ha ki jaka treikam, naduh u Jymmang haduh u Nailar 2026. Ha kane ka por, ki la leit jngoh ïa ki shnong bapher bapher ha Khasi Hills, Ri Bhoi bad West Jaintia Hills, bad ïakren bad ki kynthei nongrep.

Ka jingpynkut ïa ka kam jong ki baroh arngut, kaba yn pynmih ha ka dur jong ka short film bad ka khana kaba jrong, la pynwandur ruh lyngba ka jingpyni dur kaba kynthup ïa ki kynthei nongrep kiba ki la ïakynduh, kiba ki la tei jingïadei bad kiba khatduh ki la pynrung ha ki khana jong ki.

I Ibapdianghun bad i Queeneerich ki la pynïaid ïa ka jingpyni dur, ha kaba ki la ïalam ïa ki paidbah ban peit ïa palat 10 tylli ki dur. Ki la ïasam ïa ki jingjia ha shwa bad ha ka por ba ki leit jngoh ïa ki shnong, ïa ki jinghikai kiba ki la ïoh shaphang ka kam jong kine ki nongrep, bad ïa ki jingshem kiba la sah ha ka jingkynmaw jong ki. Hadien kane, la pyni ïa ka film kaba dang long kum ka preview, kaba la shna da ka Ibapdianghun bad kaba kyrteng “A Farmer’s Daughter”. Ka film ka ïathuh ïa ka khana kaba sngewtynnad shaphang ka Kong Jasenta Ranee, ka nongrep kaba trei ïa ka rep jhum, kaba la heh ryngkat bad ka jinghikai rep na u kpa jong ka bad kaba haduh mynta kam pat ju sangeh ïa kane ka kam. Ka film ka pyni ïa ka jingïaineh jong ka hapdeng ka jinghap slap bym lah ban tip lypa bad ki eriong slapïong, ka jingsngewkhia jong ka halor ka jingïada ïa ki symbai, bad ka kynhun jong ki kynthei kiba trei rep lang bad ka.

Hadien ka jingpeit film, la pynlong ïa ka jingïakren hapdeng ki paidbah bad ki nongpynlong prokram halor kumno ki sngew ïa ka rukom ba la pyni ïa ki ha ka film bad ki dur, bad kumno ki sngewthuh ïa ka kam jong ki kum ki kynthei nongrep. Ka Kong Jacenta Ranee, ka nongrep na Nongtraw kaba la paw ha ka film, ka la ong, “Nga sngewkmen shibun ba i Iba bad i Queenie ki la wan sha shnong jong ngi ban ring dur ïa ki rukom rep tynrai jong ngi. Ki khun jong nga ruh ki la paw ha ka film, bad nga sngewnguh ba nga la ïoh bynta ha kane ka film namar nga ïoh ïa ka lad ban pyni ïa kiwei pat ki briew, kata ki paidbah, ïa ka jingtip jong nga bad ïa ka jingim jong nga kum ka nongrep.”

Kawei pat ka bynta kyrpang jong kane ka prokram ka long ka jingïalang kaba la pynkhreh kyrpang na ka bynta 50 ngut ki khynnah skul na kawei ka skul kaba don hajan Mawstep, khnang ba kin ïoh wan peit ïa ka jingpyni dur bad ka jingpeit film. Ki khynnah ki la ïaid peit ïa man la ki dur ha ka jingpyni, peit ïa ka film, bad ïashim bynta ha ka jingïalehkai kaba sngewtynnad halor ka jingbun jait jong ki jingbam tynrai ha  Meghalaya, ban pyniar ïa ka jingsngewthuh jong ki shaphang ki rukom bam jong ka thaiñ bad ka pateng jong ki rukom shet jingshet tynrai.

Haba pynpaw ïa ki jingsngew jong ka hadien ka jingpeit film, i Queency Riahtam, ka samla na Nongtraw kaba pule ha kolej, ka la ong, “Ka film ka la hikai ïa nga shibun ki jinghikai kiba kordor. Khamtam kum ka briew kaba la kha bad la san ha nongbah, ngam shym la ïoh shibun ki lad ban ïashim bynta ha ka rep ka riang. Ka film ka la pynkynmaw ïa nga ba ngim dei ban iehnoh ïa ka rep ka riang, watla ngi la ïoh ïa ki kyrdan pule kiba heh, namar ka rep ka riang ka dang long ka bynta kaba kongsan ha ka jingim jong ngi bad ka pynthikna ïa ka jingdon ïa ki bam na ka bynta baroh. Nga kwah ruh ban ai khublei shibun ïa ka NESFAS bad ki nongïalam jong ka kiba la ïarap ïa ngi ban nang shaphang ki jingbam ba mih hi na ka mariang bad ban pynim biang ïa ki rukom rep tynrai jong ngi, kiba bun na ngi kim shym la tip bha mynshwa.”

Ha ka jingbishar lang, ka prokram ka la long kaba seisoh ha kaba la ïoh ban pyni iaka jingmih bad ka jingseisoh jong ka kam ba la lamkhmat da ka Ibapdianghun bad ka Queeneerich ka ba lah pyntyllun mynta la shi snem, lyngba ki khana kiba la mih na ki jingim jong ki nongshong shnong hi.

Ka Kong Alethea Kordor Lyngdoh, ka Deputy Executive Director jong ka NESFAS, ka la ong, “Kaei kaba ngi la sakhi mynta ka sngi ka long kaba phylla bad kaba ktah shisha ïa ka dohnud. Ka Queenee bad ka Iba ki la trei bha shisha ban pynim ïa kine ki khana kiba mih na ki jaka shnong. Ki khana kum kine ki dei ban ïoh ïa ka lad ban shah sngap, namar ki pynkynmaw ïa ngi ba katto katne na ki jingmut bad ki lad pynbeit kiba donbor tam ki wan beit na ki paidbah ha ki shnong jong ngi.”

Haba bynrap ïa kane, u Chef Thomas Zacharias, u nong seng ïa ka The Locavore, u la ong shaphang kane ka prokram bad ka jingïatreilang bad ka NESFAS, “Ka jingtip jong ki kynthei halor ka rep ka riang ka don ha ki rai ba ki shim man la ka sngi, ha ki jingïakren bad ha ki kam ba ki trei. Ngi kwah ïa kine ki khana ba kin ïarap ïa ki briew ban ithuh ïa ka jingkordor jong kane ka jingtip bad ïa ki jingkitkhlieh kiba hap halor ki kynthei kiba pynneh pynsah ïa ka rukom pynmih bam jong ngi. Ka jingpynphai biang ïa kane ka kam sha ki shnong ka ai ruh ïa ngi ka lad kaba kongsan ban sngap bad ban nang na ki paidbah.”