Kynduh ka KSU ia u DC ban pynkynmaw ki jingdawa halor ka bording ilektrik

Ka Khasi Students’ Union (KSU), Nongpoh Circle ha ka 13 tarik Risaw 2026, ka la leit ban ïakynduh ïa u Deputy Commissioner ka Ri Bhoi District, ban pynsngew iaka jingeh halor ka jingthut jong ka bording elektrik ha Nongpoh bad ki thaiñ ba marjan.

Ha kane ka jingleit kynduh ka seng ïa u Deputy Commisioner ka Ribhoi la lamkhmat da u Samla Baiashanlang Kharshanlor, General Secretary ka KSU Nongpoh Circle, ryngkat bad ki nongïalam bad ki dkhot jong ka Seng.

Ha kane ka jingïakynduh, la pynkynmaw ba ka KSU ka la buh ïaka jingdawa ban pynbeit ïa ka jingeh jong ka bording bad ban shna ïa ka 132/33 kV Substation ha Nongpoh naduh u snem 2012, ha kaba ka KSU, ryngkat bad kiwei pat ki seng bhalang bad ki Rangbah Shnong jong ka thaiñ Nongpoh, ki la pynsngew ïa kane ka jingeh kaba ktah ïa ki nongshong shnong, hynrei ka jingthut jong ka bording ka dang ïai bteng haduh mynta.

Ka KSU ka pynpaw ba ka jingthud jong ka Bording haki thaiñ Nongpoh ka la wanrah ïa ka jingeh kaba khraw ïa ki nongshong shnong, ki kam khaiï pateng, ki jaka pule bad wat iaki jaka treikam jong ki tnad Sorkar bapher bapher.

Ka KSU ka la pynkynmaw ruh, ha ka 3 tarik Nailar 2023, ka Seng ka la shim biang ïa ki sienjam ban dawa ïa ka jingpynbeit ïa kane ka jingeh, dakaba pynlong ïaka jingiaid paidbah (rally)ban pynsngew ïa ka jingeh jong ki paidbah halor ka jingthut khah-khah jong ka bording bad la aiti ruh ïa ka Memorandum sha u Deputy Commissioner ka Ri Bhoi District ban dawa ban wanrah noh daka 132/33 kV Substation ha Nongpoh.

Haba jubab halor ka jingpynpaw jong ka KSU ha ka 13 tarik Risaw 2026, u Deputy Commissioner u Dr. Abhishek Saini u la kular ba un buddien ïa kane ka kam bad ki bor ba dei khmih jong ka Meghalaya Energy Corporation Limited (MeECL) bad ban wad ïa ka lad ban pynbeit kloi ia kane ka mat.

U Deputy Commisioner ka Ribhoi u la pynpaw ruh ba ïa kane ka jingeh ym lah ban pynbeit hapoh shi sngi, hynrei un ïakren bad buddien bad ka tnad ba dei khmih ban ïoh ïa ka jubab halor kane ka kam hakaba un sa pynlong ïa ka jingïalang hapdeng ka District Administration, ka MeECL bad ki nongialam ka KSU, khnang ban ïakren bniah halor kane ka jingeh bad ban wad ïa ki lad ki lynti ban pynbeit ïa ka jingthut jong ka bording.

Haba kren sha ki lad pathai khubor, u Samla Baiashanlang Kharshanlor, General Secretary ka KSU Nongpoh Circle, u la pynpaw ïa ka jingsngewkhia halor ka jingbteng jong ka jingthut jong ka bording ha Nongpoh, da kaba ong ba “ka jinglong jingman jong ka Bording Elektrik ha ki thañ Nongpoh ka la long kum ba ïalehkai iarieh”, watla ka seng ka la ju pyrshang bunsien ban pynsngew sha ka bor shynshar District ban pynbeit ïa kane ka jingeh.

U la ong ba kane ka jingthud jong ka bording ka ktah ym tang ïa ki longïing hynrei ka la ktah ruh ïa ki nongkhaiï pateng, ki nongseng kam lajong bad ki khynnah pule kiba dang pynkhreh ïa ki eksamin.

U Samla Baiashanlang Kharshanlor u la pynpaw ruh ba ka Sorkar ka kyntu ïa ki Samla ban seng ia ki kam lajong bad ïeng ha la ki jong ki kjat, hynrei ka jingkylli ka mih ba kumno kine ki nongseng kam kin lah ban pyntyllun iaki kam jong ki lada ka Bording Elektrik kam long kaba tikna bad kim ioh bam pyndonkam ha kapor ba ki donkam iaka.

Khatduh, u Samla Kharshanlor u la ong ba ka seng ka dawa naka Sorkar ba ka dei ban shimkhia noh mardor ia kane ka mat bad ban wat ki lad ki lynti khnang ban weng noh ia kane jingthud jong la Bording Elektrik kaba ki paidbah ki la mat mynta la kumba 13 snem eiei.